کرکٹ کے سب سے بڑے ٹکراؤ کی راہ ہموار: پاکستان کا سری لنکا میں بھارت کے خلاف کھیلنے کا اعلان

اسلام آباد / کولمبو : عالمی کرکٹ کے مداحوں کے لیے بڑی خوشخبری سامنے آ گئی ہے۔ پاکستان نے تمام تر تحفظات کے باوجود کرکٹ کی بقا اور علاقائی ہم آہنگی کی خاطر بھارت کے ساتھ میچ کھیلنے کا بڑا فیصلہ کر لیا ہے۔ تازہ ترین اطلاعات کے مطابق، پاکستان اور بھارت کے درمیان ٹاکرا اب 15 فروری کو سری لنکا کی سرزمین پر ہوگا۔
یہ اہم فیصلہ وزیراعظم پاکستان نے سری لنکا کے صدر اور بنگلہ دیش کرکٹ بورڈ (BCB) کے سربراہ کی جانب سے کی جانے والی خصوصی رابطوں اور درخواستوں کے بعد کیا ہے۔ ذرائع کا کہنا ہے کہ سری لنکن قیادت اور بنگلہ دیشی حکام نے پاکستان کو قائل کیا کہ پاک بھارت میچ کی منسوخی سے نہ صرف کرکٹ کی ساکھ متاثر ہوگی بلکہ ایشیائی کرکٹ بلاک کو بھی شدید مالی و انتظامی دھچکا لگے گا۔
وزیراعظم پاکستان نے واضح کیا کہ پاکستان ہمیشہ سے کھیلوں کو سیاست سے پاک رکھنے کا حامی رہا ہے۔ اگرچہ بھارت کی ہٹ دھرمی کے باعث ڈیڈ لاک برقرار تھا، لیکن سری لنکا جیسے دوست ملک کی میزبانی اور بنگلہ دیش کی حمایت کو دیکھتے ہوئے پاکستان نے وسیع تر مفاد میں سری لنکا کے مقام پر کھیلنے پر آمادگی ظاہر کر دی ہے۔
باقاعدہ وینیو کا حتمی اعلان پی سی بی کی جانب سے متوقع ہے، تاہم ذرائع کے مطابق 15 فروری کو کولمبو یا پالیکیلے میں دونوں روایتی حریف آمنے سامنے ہوں گے۔ اس فیصلے کے بعد آئی سی سی اور براڈکاسٹرز نے سکھ کا سانس لیا ہے، کیونکہ اس ایک میچ سے کروڑوں ڈالر کے ریونیو کی واپسی کی امید پیدا ہو گئی ہے۔
اس خبر کے جنگل کی آگ کی طرح پھیلتے ہی سوشل میڈیا پر کرکٹ شائقین کا جوش و خروش دیدنی ہے۔ مبصرین کا کہنا ہے کہ پاکستان کے اس مثبت فیصلے نے گیند اب بھارت کے کورٹ میں ڈال دی ہے، اور دنیا اب یہ دیکھ رہی ہے کہ کیا بھارتی ٹیم بھی اس کھیل دوستی کا جواب مثبت انداز میں دیتی ہے یا نہیں۔