لاہور( ملک ظہیر)
لاہور میں تین روزہ بسنت فیسٹیول کے آغاز سے قبل آئی جی پنجاب راؤ عبدالکریم نے اندرون شہر موچی گیٹ کا دورہ کر کے سکیورٹی انتظامات کا تفصیلی جائزہ لیا۔
اس موقع پر ڈی آئی جی آپریشنز لاہور محمد فیصل کامران ایس پی سٹی محمد بلال اور دیگر سینئر پولیس افسران بھی ہمراہ موجود تھے۔ ڈی آئی جی آپریشنز نے آئی جی پنجاب کو بسنت کے دوران نافذ سکیورٹی پلان، نفری کی تعیناتی اور حساس مقامات کی نگرانی پر بریفنگ دی۔
آئی جی پنجاب نے لاہور پولیس کو ہدایت کی کہ حکومتی ضابطہ اخلاق اور بسنت ایس او پیز پر ہر صورت عملدرآمد یقینی بنایا جائے تاکہ شہری بلاخوف و خطر تہوار منا سکیں۔ انہوں نے واضح کیا کہ دھاتی اور کیمیکل ڈور کے استعمال سمیت کسی بھی پابندی کی خلاف ورزی پر قانون بلاامتیاز حرکت میں آئے گا۔
انسپکٹر جنرل پولیس پنجاب راؤ عبدالکریم کے مطابق لاہور پولیس نے محفوظ بسنت کے لیے مکمل تیاری کر لی ہے، کائٹ فلائنگ ایکٹ کی خلاف ورزی پر اب تک 1600 مقدمات درج کیے جا چکے ہیں جبکہ شہر بھر میں 10 ہزار سے زائد پولیس افسران و اہلکار سکیورٹی ڈیوٹی پر تعینات ہیں۔ شہریوں کی بڑی آمد کے پیش نظر اضافی ٹریفک اہلکار بھی مختلف شاہراہوں پر مامور کیے گئے ہیں۔ انہوں نے بتایا کہ سکیورٹی کے مؤثر انتظام کے لیے لاہور کو تین زونز میں تقسیم کیا گیا ہے، جبکہ ڈرونز اور سی سی ٹی وی کیمروں کے ذریعے مسلسل نگرانی جاری ہے۔ آئی جی پنجاب نے دوٹوک الفاظ میں کہا کہ کسی کو ریلیکس ماحول نہیں ملے گا اور قانون توڑنے والوں کے لیے بچ نکلنا ممکن نہیں ہوگا۔ وزیر اعلیٰ پنجاب مریم نواز شریف کی ہدایت پر شہریوں کو بسنت ایس او پیز سے آگاہ کرنے کے لیے بھرپور مہم بھی جاری ہے۔ آئی جی پنجاب نے عوام سے اپیل کی کہ وہ ذمہ داری کا مظاہرہ کریں اور محفوظ بسنت کو یقینی بنانے کے لیے ضابطہ اخلاق کی مکمل پابندی کریں۔