کراچی : کراچی کی سٹی کورٹ میں یوٹیوبر رجب بٹ کو مبینہ طور پر وکلا کے ایک گروپ نے تشدد کا نشانہ بنا دیا جس سے ان کی شرٹ پھٹ گئی۔تفصیلات کے مطابق یوٹیوبر رجب بٹ سٹی کورٹ کراچی میں توہین مذہب کے مقدمے کے سلسلے میں پیشی کے لیے پہنچے تھے۔ جیسے ہی وہ عدالت کے احاطے میں داخل ہوئے، وکلا کے ایک گروپ نے ان کے خلاف نعرے بازی شروع کر دی جو بعد ازاں دھکم پیل اور تشدد میں تبدیل ہو گئی۔ عینی شاہدین کے مطابق اس دوران رجب بٹ کی شرٹ پھٹ گئی اور انہیں شدید دباؤ کا سامنا کرنا پڑا۔
واقعے کے دوران رجب بٹ کے وکلا نے بیچ بچاؤ کی بھرپور کوشش کی اور انہیں محفوظ مقام پر منتقل کرنے کی کوشش کی، تاہم ہجوم کی شدت کے باعث کچھ دیر کے لیے صورتحال قابو سے باہر رہی۔ رجب بٹ اس مقدمے میں اس وقت عبوری ضمانت پر ہیں اور قانونی کارروائی عدالت میں جاری ہے۔دوسری جانب پولیس حکام کا کہنا ہے کہ سٹی کورٹ میں پیش آنے والے واقعے کی رپورٹ طلب کر لی گئی ہے اور تشدد میں ملوث افراد کی نشاندہی کے بعد قانونی کارروائی کی جائے گی۔ پولیس نے واضح کیا کہ عدالتی احاطے میں امن و امان برقرار رکھنا ان کی ذمہ داری ہے اور کسی کو قانون ہاتھ میں لینے کی اجازت نہیں دی جا سکتی۔