لاہور:(حافظ نعیم سے ) وزیراعلیٰ پنجاب مریم نواز شریف نے سعودی عرب کے قومی دن کے موقع پر سعودی قیادت اور عوام کو دلی مبارکباد پیش کی ہے۔ انہوں نے کہا کہ اہلِ پنجاب کی طرف سے خادمینِ حرمین شریفین شاہ سلمان بن عبدالعزیز اور ولی عہد شہزادہ محمد بن سلمان کو خصوصی تہنیت پیش کرتی ہوں۔
مریم نواز شریف نے اپنے پیغام میں کہا کہ "سعودی عرب میں قومی دن کا جشن ہے تو پاکستان بھی خوش ہے، کیونکہ یہ رشتہ صرف سفارتی نہیں بلکہ روحانی، دینی اور جذباتی ہے۔”
انہوں نے کہا کہ سعودی عرب پاکستان کا محض دوست نہیں بلکہ ہر مسلمان کے لیے محبت اور عقیدت کا مرکز ہے۔ وزیراعلیٰ پنجاب نے اس بات پر زور دیا کہ پاکستان اور سعودی عرب کے درمیان حالیہ دفاعی معاہدہ نہ صرف دو طرفہ اعتماد کا مظہر ہے بلکہ امتِ مسلمہ کی ڈھال بھی ہے۔
مریم نواز شریف کا کہنا تھا کہ پاکستان کو محافظ الحرمین الشریفین ہونے کا اعزاز حاصل ہے، اور پوری قوم اس پر فخر کرتی ہے۔ کڑے وقت میں پاکستان کا بھرپور ساتھ دینے پر سعودی قیادت اور عوام کے شکرگزار ہیں۔
ان کا مزید کہنا تھا کہ سعودی عرب کی سرزمین امتِ مسلمہ کے لیے اتحاد، عقیدے اور حوصلے کی علامت ہے، اور ہم دعا گو ہیں کہ اللہ تعالیٰ سعودی عرب کو ہمیشہ امن، ترقی اور خوشحالی سے نوازے۔