لاہور:(حافظ نعیم )وزیر اطلاعات پنجاب عظمیٰ بخاری نے کہا ہے کہ پنجاب نے ملکی تاریخ کے سب سے بڑے سیلاب کا سامنا کیا، پنجاب حکومت کے بروقت اقدامات سے لاکھوں جانیں بچا لی گئیں ۔
اپنے ایک بیان میں عظمی بخاری کا کہنا تھا کہ وزیر اعلی مریم نواز اور انکی ٹیم سیلاب متاثرین کی خدمت میں دن رات مصروف ہیں۔پنجاب حکومت نے ملکی تاریخ کا سب سے بڑا ریسکیو آپریشن کیا ہے جبکہ پنجاب حکومت سیلاب متاثرین کے لیے تمام اپنے وسائل استعمال کررہی ہے۔
وزیراطلاعات پنجاب عظمی بخاری نے کہا ہے کہ سیلاب متاثرین کی آباد کاری ایک بڑا چیلنج ہے،سیلاب کے نقصان کا تخمینہ لگایا جا رہا ہے۔ ایک دفعہ سروے مکمل ہونے کے بعد مریم نواز جلد ریلیف پیکج کا اعلان کریں گی۔
انہوں نے کہا کہ پنجاب حکومت پر انگلی وہ اٹھا رہے جن کے اپنے صوبے میں سیلاب اور بارشوں سے سینکڑوں لوگ جان بحق ہوئے۔خیبرپختونخواہ میں متاثرہ لوگ آج بھی بے یارومددگار پڑے ہیں۔کے پی میں صوبائی حکومت لوگوں کے مسائل حل کررہی نہ اپنی رٹ قائم کرپا رہی ہے۔