چکوال (رپورٹ: مہتاب نصیر اعوان)
چکوال کے مصروف ترین علاقے پنڈی روڈ پر نیو مدینہ ہوٹل کے سامنے ایک افسوسناک ٹریفک حادثہ پیش آیا، جہاں سڑک عبور کرنے والی ایک بزرگ خاتون تیز رفتار موٹر سائیکل کی زد میں آ کر شدید زخمی ہو گئیں، جبکہ حادثے کا ذمہ دار موٹر سائیکل سوار موقع سے فرار ہونے میں کامیاب ہو گیاواقعے کی اطلاع ملتے ہی ریسکیو 1122 کی ٹیم نے فوری طور پر موقع پر پہنچ کر زخمی خاتون کو ابتدائی طبی امداد فراہم کی اور تشویشناک حالت کے پیشِ نظر مزید علاج کے لیے فوری طور پر ہسپتال منتقل کر دیا۔حادثے کے بعد ایک اور قابلِ تحسین پہلو اس وقت سامنے آیا جب ستھرا پنجاب کی ٹیم نے انسانی ہمدردی اور اعلیٰ ذمہ داری کا مظاہرہ کرتے ہوئے زخمی بزرگ خاتون کی شناخت اور ان کے اہلِ خانہ کی تلاش کے لیے قریبی محلے میں گھر گھر جا کر معلومات حاصل کیں۔ ٹیم کی انتھک کوششوں کے نتیجے میں بالآخر خاتون کے لواحقین کو تلاش کر کے انہیں واقعے سے باقاعدہ آگاہ کر دیا گیا۔مقامی شہریوں اور عوامی حلقوں نے ریسکیو 1122 کی بروقت امدادی کارروائی اور ستھرا پنجاب کے عملے کی جانب سے بزرگ خاتون کے اہلِ خانہ کو ڈھونڈنے کی اس اخلاقی کاوش کو بھرپور انداز میں سراہا ہے۔ عوامی حلقوں کا کہنا ہے کہ ہنگامی حالات میں سرکاری اداروں کے اہلکاروں کی فرض شناسی، انسانیت دوستی اور احساسِ ذمہ داری معاشرے کے لیے ایک قابلِ تقلید مثال ہے۔



