واشنگٹن:
امریکہ میں بچے کی پیدائش کے ذریعے شہریت حاصل کرنے کی روایت (جسے عام طور پر "برتھ ٹورازم” کہا جاتا ہے) کے خلاف حکومت نے گھیرا تنگ کرتے ہوئے سخت اقدامات کا آغاز کر دیا ہے۔ حالیہ کارروائیوں کے دوران امریکہ نے 6 ہزار سے زائد افراد کے ویزے منسوخ کر دیے ہیں۔
امریکی حکام اور سکیورٹی اداروں کا اس حوالے سے کہنا ہے کہ وزٹ ویزا پر امریکہ آ کر بچوں کو جنم دینے اور اس کے ذریعے شہریت حاصل کرنے کے رحجان کو روکنے کے لیے امیگریشن اور قونصلر سطح پر سخت پالیسیاں نافذ کی جا رہی ہیں۔
یہ کارروائی ان افراد کے خلاف کی گئی ہے جن کے بارے میں امریکی حکام کو شواہد یا شبہات ملے کہ انہوں نے وزٹ ویزا کا غلط استعمال کرتے ہوئے صرف بچے کی پیدائش اور شہریت کے حصول کے لیے امریکی سرزمین کا سفر کیا۔
امریکی انتظامیہ کا ماننا ہے کہ ویزا قوانین کا یہ غلط استعمال ملک کے امیگریشن نظام پر براہِ راست اثر انداز ہوتا ہے۔ حکام نے واضح کیا ہے کہ مستقبل میں بھی قوانین کی خلاف ورزی کرنے والوں کے خلاف سخت قانونی کارروائیاں جاری رکھی جائیں گی اور ویزا کے غلط استعمال پر زیرو ٹالرینس کی پالیسی اپنائی جائے گی۔