ہنگورجہ (رپورٹ: فیاض محسن سولنگی)
رسول آباد کے قریب پیر پریل شاہ بخاری کے سامنے قومی شاہراہ پر تیز رفتار مسافر وین اوورٹیکنگ کے دوران ڈرائیور کے قابو سے باہر ہو کر سڑک پر الٹ گئی، جس کے نتیجے میں وین میں سوار 12 سے زائد مسافر زخمی ہوگئے، جبکہ زخمیوں میں شامل 65 سالہ خاتون زوجہ محمد عمر زخموں کی تاب نہ لاتے ہوئے جاں بحق ہوگئیں۔ حادثے کے باعث خواتین اور معصوم بچوں سمیت مسافروں میں خوف و ہراس پھیل گیا۔حادثے میں 3 مردوں، 7 سے زائد خواتین اور 2 معصوم بچوں سمیت متعدد مسافر زخمی ہوئے۔ زخمیوں میں محمد امین کلہوڑو، ضمیر حسین کلہوڑو اور مولا بخش کلہوڑو بھی شامل ہیں۔حادثے کے فوری بعد علاقہ مکینوں اور موقع پر موجود افراد نے اپنی مدد آپ کے تحت زخمیوں کو وین سے نکال کر رورل ہیلتھ سینٹر (آر ایچ سی) ہنگورجہ منتقل کیا، جہاں ڈاکٹروں نے انہیں ابتدائی طبی امداد فراہم کی۔ تاہم متعدد زخمیوں کی حالت تشویشناک ہونے کے باعث انہیں مزید علاج کے لیے گمس اسپتال گمبٹ ریفر کردیا گیا۔خوفناک حادثے میں 65 سالہ خاتون کی ہلاکت پر علاقے میں سوگ اور افسوس کی فضا چھا گئی، جبکہ خواتین اور معصوم بچوں سمیت زخمی مسافروں کی وجہ سے اسپتال میں بھی تشویش کی صورتحال پیدا ہوگئی۔علاقہ مکینوں کا کہنا ہے کہ قومی شاہراہ پر تیز رفتاری اور ڈرائیوروں کی غفلت کے باعث حادثات معمول بن چکے ہیں۔ انہوں نے ٹریفک حکام سے مطالبہ کیا ہے کہ مسافر گاڑیوں کی رفتار کو کنٹرول کرنے اور غیر ذمہ دارانہ اوورٹیکنگ کے خلاف سخت کارروائی کی جائے تاکہ قیمتی انسانی جانوں کو ضائع ہونے سے بچایا جاسکے۔