قصور : سلطان فرید کی رپورٹ
نواحی گاؤں پنڈی جٹاں میں غوثیہ میلاد النبی ﷺ کمیٹی کے زیرِ اہتمام عظیم الشان محفلِ میلادِ مصطفیٰ ﷺ کا انعقاد کیا گیا، جس میں علاقے بھر سے معزز شخصیات، علماء کرام اور عاشقانِ رسول ﷺ نے بھرپور شرکت کی۔محفل کا باقاعدہ آغاز تلاوتِ قرآن پاک سے ہوا، جس کی سعادت حافظ محمد مزمل فرید قادری صاحب نے حاصل کی، جبکہ بارگاہِ رسالت مآب ﷺ میں نعتِ رسول مقبول ﷺ پیش کرنے کی سعادت حافظ شان فرید نوری صاحب نے حاصل کی۔ منقبت پیش کرنے اور مختصر خطاب کی سعادت علامہ مولانا نازک فرید قادری صاحب نے حاصل کی۔محفل کی صدارت حافظ محمد شہزاد صاحب نے کی، جبکہ خصوصی خطاب کے لیے ممتاز عالمِ دین حضرت علامہ مولانا قاری محمد آصف علی نوری صاحب نے خصوصی شرکت فرمائی۔اپنے خصوصی خطاب میں حضرت علامہ مولانا قاری محمد آصف علی نوری صاحب نے عقیدہ ختمِ نبوت ﷺ کی اہمیت و فضیلت پر تفصیلی روشنی ڈالتے ہوئے کہا کہ عقیدہ ختمِ نبوت ہمارے ایمان کا بنیادی جزو ہے۔ انہوں نے شرکاء محفل کو عشقِ رسول ﷺ، دینی تعلیمات اور سنتِ نبوی ﷺ پر عمل پیرا ہونے کی تلقین کی۔محفل کے دوران شرکاء نے انتہائی عقیدت و احترام کے ساتھ بارگاہِ رسالت ﷺ میں نذرانۂ عقیدت پیش کیا۔ محفل میں درود و سلام کی صداؤں سے فضا معطر رہی، جبکہ اختتام پر امتِ مسلمہ، ملک پاکستان کی سلامتی، ترقی اور خوشحالی کے لیے خصوصی دعا بھی کی گئی۔واضح رہے کہ غوثیہ میلاد النبی ﷺ کمیٹی پنڈی جٹاں کے زیرِ اہتمام ہر سال محفلِ میلادِ مصطفیٰ ﷺ کا باقاعدگی سے انعقاد کیا جاتا ہے، جس کا بنیادی مقصد عشقِ رسول ﷺ کو فروغ دینا، نئی نسل میں دینی شعور بیدار کرنا اور اسلامی تعلیمات کو عام کرنا ہے۔
