عمرکوٹ (بیورو رپورٹ: ڈاکٹر ایم لال واگھانی)
پتھورو کے نواحی گاؤں الہڈنو مری کے رہائشی میر محمد ولد گل مری نے اپنے رشتہ داروں کی جانب سے مبینہ زیادتیوں اور زرعی زمین پر قبضے کی کوشش کے خلاف پٹھورو پریس کلب کے سامنے احتجاجی مظاہرہ کیا۔میڈیا سے گفتگو کرتے ہوئے میر محمد نے بتایا کہ ان کے دادا کی زرعی اراضی میں ان کے والد کا 4 ایکڑ اور 13 گنٹہ حصہ قانونی طور پر شامل ہے، تاہم ان کے ماموں شوکت مری، ابوبکر مری اور چچا صوبدار مری زبردستی اس اراضی پر قبضے کی کوشش کر رہے ہیں، جبکہ اس زرعی زمین پر ان کے چچا اور چچی نے مکانات بھی تعمیر کر رکھے ہیں۔
متاثرہ شہری کا کہنا تھا کہ اس زرعی اراضی کا مقدمہ سول کورٹ عمرکوٹ میں زیر سماعت ہے، جس کی اگلی سماعت رواں ماہ کی 24 تاریخ کو ہونی ہے، لیکن عدالتی فیصلہ آنے سے قبل ہی انہیں مسلسل ہراساں کیا جا رہا ہے۔گذشتہ شب پتھورو پولیس نے بروقت کارروائی کرتے ہوئے موقع پر پہنچ کر دونوں فریقین کو حراست میں لے لیا ہے اور پولیس متاثرہ فریق کے ساتھ مکمل تعاون کر رہی ہے۔ میر محمد نے آئی جی سندھ، ڈی آئی جی میرپورخاص، ایس ایس پی عمرکوٹ اور دیگر اعلیٰ حکام سے اپیل کی ہے کہ اس معاملے کی شفاف تحقیقات کر کے انہیں انصاف فراہم کیا جائے۔