کراچی: صحافی اور "عوام راج تحریک” کے بانی اقرار الحسن کے معاملے میں اہم پیش رفت سامنے آئی ہے۔ کراچی کے جوڈیشل مجسٹریٹ شرقی نے اقرار الحسن کو چار روزہ جسمانی ریمانڈ پر نیشنل سائبر کرائم انویسٹیگیشن ایجنسی (NCCIA) کے حوالے کر دیا ہے۔عدالت میں پیش کی گئی ایف آئی آر کے مطابق ملزم پر سوشل میڈیا پر مبینہ طور پر ملک مخالف مواد شیئر کرنے، غلط معلومات پھیلانے اور عوام کے اندر خوف و ہراس پیدا کرنے جیسے سنگین الزامات عائد کیے گئے ہیں۔
پیکا ایکٹ (PECA) کی دفعات کے تحت مقدمہ درجاین سی سی آئی اے کی جانب سے اقرار الحسن کے خلاف پاکستان الیکٹرانک کرائمز ایکٹ (PECA) کی دفعات 9، 10، 20، 24 اور 26 اے کے تحت مقدمہ درج کیا گیا ہے۔تفتیشی افسر نے عدالت کے روبرو مؤقف اختیار کیا کہ ملزم سے تفتیش اور مقدمے سے متعلق اہم ڈیجیٹل شواہد بشمول موبائل فون، لیپ ٹاپ اور سم کارڈز برآمد کرنے ہیں، اس کے علاوہ اس کیس میں ملوث دیگر ممکنہ ملزمان کی شناخت اور گرفتاری کے لیے تفتیش ضروری ہے۔ اس مقصد کے لیے تفتیشی افسر نے 14 روزہ جسمانی ریمانڈ کی استدعا کی تھی، تاہم عدالت نے فریقین کے دلائل سننے کے بعد چار روزہ جسمانی ریمانڈ منظور کرتے ہوئے ملزم کو تحقیقاتی ادارے کے حوالے کر دیا۔