نئی دہلی: میونسپل کارپوریشن آف دہلی کی جانب سے جاری کردہ حالیہ رپورٹ کے مطابق قومی دارالحکومت میں ڈینگی کے کیسز میں تشویشناک اضافہ دیکھا جا رہا ہے۔ اکتوبر کے پہلے ہی ہفتے میں ڈینگی کے 98 نئے کیسز درج کیے گئے ہیں، جس کے بعد رواں سال 2026 میں متاثرہ افراد کی مجموعی تعداد 695 تک پہنچ گئی ہے۔ رپورٹ کے مطابق ستمبر کا مہینہ رواں سال کا سب سے زیادہ ڈینگی متاثرہ مہینہ رہا تھا، جس کے بعد اکتوبر کے آغاز میں بھی کیسز کے مسلسل سامنے آنے کا سلسلہ جاری ہے۔ ڈینگی انفیکشن کے باعث مریضوں کو شدید بخار کے ساتھ جسم اور جوڑوں میں شدید درد کا سامنا کرنا پڑتا ہے، اسی وجہ سے اسے عام زبان میں "ہڈی توڑ بخار” بھی کہا جاتا ہے۔ دیگر علامات میں قے، متلی اور پیٹ کا درد شامل ہیں، جبکہ شدید نوعیت کے کیسز میں "ڈینگی شاک سنڈروم” جیسی پیچیدگیاں پیدا ہو سکتی ہیں۔طبی ماہرین اور میونسپل حکام نے شہریوں کو ہدایت کی ہے کہ وہ اپنے گھروں اور آس پاس کے علاقوں میں صاف پانی جمع نہ ہونے دیں، جبکہ بخار یا دیگر علامات ظاہر ہونے پر فوری طور پر طبی معائنہ کروائیں۔
دارالحکومت میں ڈینگی بے قابو: رواں سال متاثرہ افراد کی مجموعی تعداد 695 ہوگئی
