پاکپتن(رپورٹ:اکرام حسین شاہ )
: پاکپتن میں پولیس اہلکاروں کی سنگین مجرمانہ غفلت سامنے آئی ہے، جہاں ڈکیتی کی وارداتوں میں ملوث خطرناک ملزم پولیس حراست سے موقع پا کر فرار ہو گیا۔تفصیلات کے مطابق تھانہ احمد یار کے ڈکیتی کے مقدمے میں زیرِ حراست ملزم بلاول کو عدالت سے جوڈیشل ریمانڈ حاصل کرنے کے بعد پاکپتن جیل منتقل کیا جا رہا تھا۔
اس دوران چک شفیع کے قریب ملزم ہتھکڑی سے اپنا ہاتھ نکال کر چَکما دیتے ہوئے فرار ہو گیا۔پولیس ذرائع کے مطابق ملزم کو کسی محفوظ سرکاری گاڑی کے بجائے پرائیویٹ موٹر سائیکل پر منتقل کیا جا رہا تھا، جو کہ سیکیورٹی اصولوں کی شدید خلاف ورزی اور غفلت کا ثبوت ہے۔واقعے کا نوٹس لیتے ہوئے انسپیکٹر رانا عمران سرور کی مدعیت میں تھانہ رنگشاہ میں ذمہ دار پولیس اہلکاروں—اے ایس آئی حبیب، محرر ہیڈ کانسٹیبل طاہر، کانسٹیبل آصف اور ڈرائیور کاشف—کے خلاف مقدمہ درج کر لیا گیا ہے۔ پولیس حکام کے مطابق فرار ملزم کی گرفتاری کے لیے علاقے میں ناکہ بندی کر کے سرچ آپریشن شروع کر دیا گیا ہے۔