عمرکوٹ (رپورٹ: بیورو چیف ڈاکٹر ایم لال واگھانی)
کنری کی منظور کالونی کی رہائشی جنت کھوسو انصاف کی فریاد لے کر نیشنل پریس کلب سامارو پہنچ گئیں، جہاں انہوں نے اپنا بیان ریکارڈ کراتے ہوئے متعلقہ حکام سے تحفظ اور انصاف فراہم کرنے کی اپیل کی۔جنت کھوسو کے مطابق ان کے سابق شوہر خالد کھوسو ولد مختیار کھوسو نے تقریباً تین سال قبل انہیں طلاق دی تھی۔ ان کے بقول ان کے دو بیٹے سابق شوہر خالد کھوسو کے پاس ہیں اور وہ اپنے بچوں کی واپسی کے لیے شدید پریشان ہیں۔انہوں نے الزام عائد کیا کہ ان کے سابق سسر مختیار کھوسو مبینہ طور پر انہیں تشدد کا نشانہ بناتے ہیں اور دوبارہ شادی کے لیے دباؤ ڈال رہے ہیں۔ جنت کھوسو کے مطابق انہیں مبینہ طور پر یہ دھمکی بھی دی گئی کہ اگر انہوں نے شادی سے انکار کیا تو ان کے دونوں بچوں کو نقصان پہنچایا جائے گا اور بعد ازاں اس کا الزام ان کے بھائی پر عائد کر دیا جائے گا۔جنت کھوسو نے نیشنل پریس کلب سامارو میں دہائی دیتے ہوئے اعلیٰ حکام سے مطالبہ کیا کہ معاملے کی شفاف تحقیقات کرائی جائیں، انہیں مکمل تحفظ فراہم کیا جائے اور بچوں کی بازیابی کے لیے قانونی کارروائی عمل میں لائی جائے۔(واضح رہے کہ مذکورہ الزامات جنت کھوسو کے بیان پر مبنی ہیں، جبکہ الزام عائد کیے گئے افراد کا مؤقف سامنے آنے پر اسے بھی خبر کا حصہ بنایا جائے گا۔)