الہ آباد (سلطان فرید سے)
الہ آباد میں ریڑھی بان پر پیرا فورس اہلکار کی جانب سے مبینہ تشدد کی ویڈیو منظرِ عام پر لانے اور معاملہ انتظامیہ کے نوٹس میں لانے والے صحافی عمران صابر مغل کو گرفتار کر لیا گیا
، جس پر چونیاں اور ضلع قصور کی صحافی برادری نے شدید تشویش اور غم و غصے کا اظہار کیا ہے۔صحافی برادری کا کہنا ہے کہ اگر کسی صحافی نے عام شہری کی آواز بلند کی اور مبینہ زیادتی کی نشاندہی کی، تو اس کی پاداش میں صحافی کو گرفتار کرنا انتہائی تشویش ناک اقدام ہے۔چونیاں اور ضلع قصور کے صحافیوں نے عمران صابر مغل کی گرفتاری کی سخت الفاظ میں مذمت کرتے ہوئے مطالبہ کیا ہے کہ معاملے کی فوری اور شفاف تحقیقات کی جائیں۔ صحافی برادری نے زور دیا کہ اگر گرفتاری کے محرکات میں صحافتی خدمات اور سچائی کو اجاگر کرنا شامل ہے تو صحافی کو فوری انصاف فراہم کر کے رہا کیا جائے۔ اختلافِ رائے یا عوامی مسائل کی نشاندہی کو دبانے کے بجائے قانون کے مطابق کارروائی ہونی چاہیے۔ آزاد اور ذمہ دار صحافت ہی عوام کی آواز حکامِ بالا تک پہنچانے کا واحد ذریعہ ہے، اور صحافیوں کی آواز دبانے سے عوامی مسائل ختم نہیں ہو سکتے۔