سیالکوٹ: پسرور (سلیم احمد اعوان شیخو، محمداشفاق سے)
ڈپٹی کمشنر سیالکوٹ محمد اویس مشتاق نے پسرور کا صبح سویرے اچانک دورہ کیا اور محمد پورہ، کلاسوالہ اور چونڈہ میں صفائی ستھرائی کے انتظامات کا تفصیلی معائنہ کیا۔ اس موقع پر انہوں نے پیدل تنگ گلیوں اور بازاروں میں پہنچ کر صفائی، سیوریج اور نکاسی آب کی صورتحال کا خود جائزہ لیا۔دورے کے دوران ڈپٹی کمشنر نے صفائی کے حوالے سے شہریوں سے براہِ راست فیڈ بیک بھی لیا، جبکہ تلونڈی روڈ پر واقع ڈمپنگ سائٹ کا معائنہ کرتے ہوئے کوڑا تلف کرنے کے عمل کی جانچ کی۔ انہوں نے تمام چھوٹے نالوں کی ڈی سلٹنگ (بھل صفائی) کا کام فوری مکمل کرنے کی سخت ہدایت کی۔صفائی کے ناقص انتظامات اور غفلت پر ڈپٹی کمشنر نے ستھرا پنجاب کے فیلڈ مانیٹرنگ آفیسر کو موقع پر ہی معطل کر دیا اور واضح کیا کہ صفائی کے عمل میں کوتاہی کسی صورت برداشت نہیں کی جائے گی۔ انہوں نے متعلقہ افسران کو فیلڈ سٹاف کی بروقت حاضری یقینی بنانے اور صفائی آپریشن کی سخت مانیٹرنگ کی ہدایت دی۔ڈپٹی کمشنر کا کہنا تھا کہ سخت مانیٹرنگ کے بغیر صفائی کے مطلوبہ نتائج حاصل نہیں ہو سکتے، جبکہ ستھرا پنجاب ویژن کے تحت صفائی کے نظام میں نمایاں بہتری کے لیے فیلڈ آپریشن مزید تیز کر دیا گیا ہے۔ انہوں نے زور دیا کہ صفائی میں غفلت پر ’زیرو ٹالرنس پالیسی‘ کے تحت کارروائی جاری رہے گی اور صبح سویرے اچانک دوروں کا سلسلہ قائم رکھا جائے گا۔اس موقع پر ایڈیشنل ڈپٹی کمشنر میونسپل سروسز میاں سرمد حسین اور اسسٹنٹ کمشنر پسرور ثناء شرافت بھی ان کے ہمراہ تھے۔