بائی پاس سڑکوں کی خستہ حالی کے باعث تمام چھوٹی بڑی گاڑیاں شہر کے اندر سے گزرنے پر مجبور، شہریوں کا فوری تعمیر و مرمت کا مطالبہ
سانگھڑ (رپورٹ: اشفاق سلہری)
سانگھڑ شہر کے اطراف قائم بائی پاس سڑکیں طویل عرصے سے غیر فعال اور زبوں حالی کا شکار ہونے کے باعث شہر میں ٹریفک حادثات میں تشویشناک حد تک اضافہ ہو گیا ہے۔
تفصیلات کے مطابق سانگھڑ شہر کے باہر سے گزرنے والے بائی پاسز کی توڑ پھوڑ، عدم توجہی اور غیر فعال ہونے کی وجہ سے تمام سنگین و ہیوی ٹریفک بشمول ٹرالرز، بسیں اور ٹریکٹر ٹرالیاں شہر کی اندرونی سڑکوں اور گنجان آباد علاقوں سے گزرنے پر مجبور ہیں۔ شہر کی مرکزی شاہراہوں پر ہیوی ٹریفک کا دباؤ بڑھنے سے آئے روز خوفناک ٹریفک حادثات رونما ہو رہے ہیں، جن میں کئی قیمتی انسانی جانیں ضائع جبکہ متعدد شہری شدید زخمی یا معذور ہو چکے ہیں۔
عوامی و تجارتی حلقوں کے مطابق بائی پاس روڈز کی بروقت مرمت اور بحالی نہ ہونے کی وجہ سے نہ صرف شہریوں کا پیدل اور موٹر سائیکل پر سفر کرنا دشوار ہو چکا ہے بلکہ شہر کے تجارتی مراکز میں شدید ٹریفک جام بھی روز کا معمول بن چکا ہے۔
شہریوں، تاجروں اور سماجی رہنماؤں نے حکومتِ سندھ، ڈسٹرکٹ ایڈمنسٹریشن سانگھڑ اور محکمہ ہائی ویز کے اعلیٰ حکام سے فوری نوٹس لینے کا مطالبہ کیا ہے کہ شہر کے تمام غیر فعال بائی پاسز کی ہنگامی بنیادوں پر تعمیر و مرمت کر کے انہیں بحال کیا جائے تاکہ ہیوی ٹریفک کو شہر کے باہر منتقل کر کے شہریوں کی قیمتی جانوں کا تحفظ ممکن بنایا جا سکے۔