سانگھڑ (اشفاق سلہری)
سانگھڑ میں عیدگاہ کے سامنے کھلے بڑے گٹر نالے میں گر کر 7 سالہ بچی المناک طور پر جاں بحق ہوگئی۔ جاں بحق ہونے والی بچی کی شناخت مری مگ خاصخیلی کے نام سے ہوئی ہے، جو کہ پیرومل کی رہائشی تھی۔ ذرائع کے مطابق بچی اپنے والدین کے ساتھ شادی کی خریداری کی غرض سے سانگھڑ آئی ہوئی تھی کہ کھلے نالے کا شکار ہو گئی۔ واقعے کے بعد مقامی شہریوں میں شدید غم و غصہ پھیل گیا۔ شہریوں نے بلدیہ کی نااہلی اور کھلے نالوں کی موجودگی پر گہری تشویش کا اظہار کرتے ہوئے ذمہ داروں کے خلاف سخت قانونی کارروائی اور شہر بھر کے تمام کھلے گٹر نالوں کو فوری طور پر ڈھانپ کر محفوظ بنانے کا مطالبہ کیا ہے۔