ماحولیاتی تحفظ عبادت ہے: وزیراعلیٰ مریم نواز کا عالمی یومِ اوزون پر پیغام

لاہور:وزیر اعلیٰ پنجاب مریم نواز شریف نے اوزون کے تحفظ کے عالمی دن کے موقع پر اپنے خصوصی پیغام میں کہا ہے کہ اوزون کی تہہ سورج کی خطرناک اور مضر شعاعوں کے خلاف ایک قدرتی ڈھال کا فریضہ سر انجام دیتی ہے، اور ماحولیاتی تبدیلیوں کے شدید اثرات سے بچنے کے لیے اس کا تحفظ ناگزیر ہے۔
وزیراعلیٰ نے ماحولیات کی اہمیت پر زور دیتے ہوئے کہا کہ اوزون کی تہہ کا تحفظ دراصل ہماری نئی نسل کے محفوظ اور صحت مند مستقبل کی ضمانت ہے، اور ماحولیاتی تحفظ محض ایک فریضہ نہیں بلکہ ہماری دینی اور اخلاقی ذمہ داری کے ساتھ ساتھ عبادت کا درجہ بھی رکھتی ہے۔ انہوں نے فخر سے یہ بات کہی کہ تاریخ میں پہلی بار پنجاب میں ‘گرین فیوچر’ کے لیے ایک جامع اور مؤثر ماحولیاتی پالیسی نافذ کی گئی ہے، جس کے تحت صوبے کو سرسبز و شاداب بنانے کے لیے عملی اقدامات جاری ہیں۔
مریم نواز شریف نے حکومت کی کارکردگی کا ذکر کرتے ہوئے بتایا کہ ‘کلین اینڈ گرین پنجاب’ کے وژن کے تحت شجرکاری، سموگ کا مکمل خاتمہ اور گرین انرجی حکومت کی اولین ترجیحات میں شامل ہیں۔ ان کے مطابق صوبے میں اب تک 50 ہزار ایکڑ اراضی پر شجرکاری کی گئی ہے اور مجموعی طور پر 5 کروڑ درخت لگائے جا چکے ہیں۔
نقل و حمل اور آلودگی کے خاتمے کے حوالے سے انہوں نے بتایا کہ کلین انرجی وژن کے تحت ہر ضلع اور تحصیل کی سطح پر ‘گرین الیکٹرو بس سروس’ چلائی جا رہی ہے، جبکہ طلبہ، خواتین اور عام شہریوں کو سفری سہولت کے لیے الیکٹرک بائیکس بھی فراہم کی جا رہی ہیں۔ اس کے علاوہ ماحول دوست ٹرانسپورٹ کے نظام کو فروغ دینے کے لیے ‘گرین ٹیکسی’ کا نظام بھی متعارف کرایا گیا ہے۔
وزیراعلیٰ پنجاب نے دعویٰ کیا کہ گزشتہ ڈھائی سال کے قلیل عرصے میں ماحولیات کے تحفظ کے لیے اتنا کام کیا گیا ہے جتنا ماضی کی کئی دہائیوں میں نہیں ہو سکا۔ انہوں نے پختہ عزم ظاہر کیا کہ پنجاب اب ایک سرسبز و شاداب مستقبل کی طرف گامزن ہے اور محفوظ ماحولیاتی مستقبل کا یہ سفر اب کسی صورت نہیں رکے گا۔ آخر میں انہوں نے عوام، بالخصوص نوجوانوں سے پرزور اپیل کی کہ وہ ماحول دوست طرزِ معاشرت اپنا کر اوزون کی تہہ اور کرہ ارض کے تحفظ میں اپنا بھرپور ملی کردار ادا کریں۔