کراچی :کراچی کے علاقے ڈیفنس فیز 6 میں ساحل کے قریب نوجوان پر مبینہ تشدد کے واقعے میں پولیس نے کارروائی کرتے ہوئے ایک ملزم کو گرفتار کرلیا، جبکہ متاثرہ نوجوان علی جعفری نے پولیس کو ابتدائی بیان ریکارڈ کرا دیا ہے۔
ذرائع کے مطابق علی جعفری نے اپنے بیان میں بتایا کہ وہ 29 اگست کو اپنے دوستوں کے ہمراہ ڈیفنس فیز 6 میں کھانا کھانے گیا تھا۔ کھانا کھانے کے بعد جب وہ باہر نکلا تو مبینہ طور پر اسے سر پر بیس بال کے ڈنڈے سے وار کیا گیا۔
متاثرہ نوجوان کے مطابق ڈنڈا لگتے ہی وہ بے ہوش ہوگیا، جس کے بعد ملزمان اسے ایک گاڑی میں ڈال کر اپنے ساتھ لے گئے۔
علی جعفری نے پولیس کو بتایا کہ ملزمان نے اسے مبینہ طور پر تشدد کا نشانہ بنایا، جبکہ ایک لڑکا پستول تانے اس کے قریب کھڑا رہا۔ ملزمان مسلسل اسے معافی مانگنے کا کہتے رہے اور اس سے پیسوں کا بھی مطالبہ کیا۔
متاثرہ نوجوان کے مطابق ملزمان نے اس کے والٹ اکاؤنٹ سے خریداری بھی کی، جبکہ اسے اور اس کی فیملی کو نقصان پہنچانے کی دھمکیاں بھی دی گئیں۔
علی جعفری نے اپنے ابتدائی بیان میں بتایا کہ مبینہ واقعے کے وقت ملک ابراہیم، ابراہیم، مرتضیٰ اور دیگر افراد بھی موجود تھے۔ اس کا کہنا ہے کہ اس کی ماضی میں کبھی کسی سے دشمنی نہیں رہی۔
پولیس نے واقعے میں ملوث ایک ملزم کو گرفتار کرلیا ہے، جبکہ دیگر ملزمان کے کردار اور واقعے کی مزید تحقیقات جاری ہیں۔ پولیس متاثرہ نوجوان کے بیان اور دیگر شواہد کی روشنی میں واقعے کی مزید تفتیش کر رہی ہے۔ تاہم پولیس نے بتایا کہ نوجوان کا گیمنگ زون میں جھگڑا ہوا تھا۔
خیال رہے کہ کراچی کے علاقے ڈیفنس میں 3 افراد نے نوجوان علی جعفری کو تشدد کا نشانہ بنا کر شدید زخمی کردیا تھا اور ڈنڈے مار کر اس کی ٹانگ بھی توڑ دی تھی جس کی ویڈیو بھی سوشل میڈیا پر وائرل ہوئی۔
نوجوان پر تشدد کا واقعہ کراچی کے علاقے ڈیفنس میں ساحل تھانے کی حدود میں پیش آیا۔ ابراہیم ملک نامی شخص نے علی نامی نوجوان کو پہلے بخاری کمرشل بلایا، جس کے بعد ملزمان نوجوان کو زبردستی اٹھا کر ساحل تھانے کی حدود میں لے گئے تھے۔
نواجون پر تشدد کرنے والوں میں ابراہیم ملک سمیت دیگر افراد شامل ہیں، ملزمان نے نوجوان پر بے رحمانہ تشدد کیا تھا اور آخر میں ڈنڈا مار کر اس کی ٹانگ بھی توڑ دی اور اسے زبردستی بال کاٹ کر کھلائے گئے اور کہا گیا خود کو گالیاں دو۔
قریبی ذرائع کا کہنا تھا کہ تشدد کا شکار نوجوان علی اس وقت شدید صدمے کی کیفیت میں مبتلا تھا، نوجوان ڈرا اور سہما ہوا ہے اور شدید خوف و ہراس کے باعث اس نے فی الحال پولیس کو بھی کوئی درخواست نہیں دی تھی۔
بعد ازاں ویڈیو منظرعام پر آنے کے بعد ڈی آئی جی ساؤتھ اسد رضا نے معاملے کا نوٹس لیتے ہوئے پولیس کو تحقیقات کا حکم دیا تھا۔