خوشاب /سرگودھا (راجہ نورالہی عاطف سے)
پاکستان میں تعینات ماریشس کے سفیر مسٹر منسورکر مس نے کہا ہے کہ پاکستانی باسمتی چاول کو دنیا میں کوئی ثانی نہیں، ماریشس کے عوام پاکستانی چاول کے دیوانے ہیں۔ پاکستانی چاول کے علاوہ پاکستان کی دیگر مصنوعات کے لیے بھی ماریشس ایک بڑی مارکیٹ ثابت ہوسکتا ہے۔ پاکستان اور ماریشس کے درمیان فری ٹریڈ ایگریمنٹ کے لیے حکومتی سطح پر کام جاری ہے اور امید ہے کہ جلد معاہدہ طے پا جائے گا۔
ماریشس کے دورے پر پاکستانی تاجروں کے لیے کھلے ہیں۔ ان خیالات کا اظہار انہوں نے سرگودھا چیمبر آف کامرس اینڈ انڈسٹری میں تاجروں سے خطاب کے دوران کیا۔ ماریشس کے سفیر نے کہا کہ دونوں ممالک کے درمیان تجارت کے فروغ کے لیے فری ٹریڈ ایگریمنٹ پر عملی سطح پر پیش رفت ہوئی ہے اور تجارتی سرگرمیوں میں نمایاں اضافہ ہوگا۔
انہوں نے کہا کہ پاکستان کے پھلوں اور سبزیوں کے علاوہ مختلف مصنوعات کی ماریشس کی مارکیٹ میں وسیع مواقع موجود ہیں۔ اس موقع پر سرگودھا چیمبر آف کامرس اینڈ انڈسٹری کے صدر خواجہ یاسر محمود نے اپنے استقبالیہ خطاب میں کہا کہ پاکستان اور ماریشس کے درمیان دوستانہ تعلقات ہیں۔ باہمی تجارت اور کاروباری تعاون کے لیے مزید اقدامات کی ضرورت ہے۔
انہوں نے کہا کہ ماریشس اپنی قدرتی خوبصورتی، پُرامن ماحول، مضبوط اقتصادی ڈھانچے اور کاروبار دوست معیشت کے باعث دنیا بھر میں منفرد شناخت رکھتا ہے۔ سرگودھا پاکستان کے اہم زرعی علاقوں میں شمار ہوتا ہے اور دنیا بھر میں اپنی زرعی پیداوار کے حوالے سے شناخت رکھتا ہے۔
خواجہ یاسر محمود نے کہا کہ سرگودھا میں کینو کے علاوہ چاول، تیل، الیکٹرک مصنوعات، کڑھائی کے دستکاری کے سامان اور دیگر مصنوعات تیار ہوتی ہیں، جنہیں ماریشس کی مارکیٹ تک رسائی دینے سے دونوں ممالک کے تاجروں کو فائدہ حاصل ہوسکتا ہے۔
اس موقع پر پاکستان میں تعینات ماریشس کے سفیر مسٹر منسورکر مس اور ان کے وفد کا سرگودھا چیمبر آف کامرس اینڈ انڈسٹری آمد پر پرتپاک استقبال کیا گیا۔ سفیر اور وفد کو مختلف شعبوں اور میرجنگ متعلق سرگرمیوں کا دورہ بھی کروایا گیا۔ سرگودھا چیمبر کے صدر خواجہ یاسر محمود نے سفیر اور ان کے وفد کو مختلف امور کے حوالے سے بریفنگ دی۔
بعدازاں سرگودھا چیمبر آف کامرس اینڈ انڈسٹری کی جانب سے ماریشس کے سفیر مسٹر منسورکر مس کے اعزاز میں عشائیہ بھی دیا گیا۔ اس موقع پر چیمبر کے عہدیداران اور دیگر شخصیات بھی موجود تھیں۔ آخر میں مہمان سفیر اور وفد کے اعزاز میں گروپ فوٹو بھی بنوایا گیا۔