بشکیک: وزیراعظم محمد شہباز شریف نے کہا ہے کہ پانی سے کروڑوں انسانوں کی زندگی اور ہماری آئندہ نسلوں کی بقا وابستہ ہے، اسے سیاسی مقاصد کے لیے بطور ہتھیار استعمال کرنا ناقابل قبول ہے۔
ایس سی او سربراہان مملکت کونسل کے اجلاس سے کلیدی خطاب کرتے ہوئے وزیراعظم نے کہا کہ تین ارب سے زائد آبادی پر مشتمل ایس سی او خطے کے ممالک مل کر ایسا بہتر مستقبل تشکیل دیں جہاں تصادم کے بجائے تعاون اور خوف کے بجائے امید ہو۔ وزیراعظم نے کہا کہ شنگھائی تعاون تنظیم عالمی امن و استحکام کے لیے اہم پلیٹ فارم ہے، ایس سی او کے پچیس سال مکمل ہونا اہم سنگِ میل ہے۔ پاکستان ایس سی او کا فعال اور ذمہ دار رکن ہے۔
Prime Minister Muhammad Shehbaz Sharif in a family photo with world leaders for the SCO+ meeting at the SCO Council of Heads of State Summit in Bishkek, Kyrgyzstan on 1 September 2026. pic.twitter.com/JNRApoHQr4
— Prime Minister's Office (@PakPMO) September 1, 2026
انہوں نے کہا کہ عالمی منظرنامہ بڑھتی ہوئی جغرافیائی کشیدگی سے دوچار ہے، ایسے میں ایس سی او مشترکہ چیلنجز سے نمٹنے کے اجتماعی عزم کی علامت ہے۔ وزیراعظم محمد شہباز شریف نے کہا کہ پاکستان تنازعات کے پُرامن حل اور بین الاقوامی قانون پر یقین رکھتا ہے، یہی وجہ ہے کہ پاکستان کی سفارتی کوششوں سے ایران اور امریکہ کے درمیان اسلام آباد مفاہمتی یادداشت پر دستخط ممکن ہوئے۔
وزیراعظم نے ایس سی او کے ارکان پر واضح کیا کہ پانی کا تعلق انسانی بقا اور آنے والی نسلوں کے مستقبل کو محفوظ بنانے سے ہے، اسے سیاسی مقاصد کے تحت بطور ہتھیار استعمال کرنا ناقابل قبول ہے۔ انہوں نے فلسطینی عوام پر اسرائیلی جارحیت اور جبر کا ذکر کرتے ہوئے کہا کہ غزہ اور مغربی کنارے میں انسانی المیہ ناقابلِ تصور مصائب کا باعث ہے۔ عالمی برادری فلسطینی عوام کے حقِ خودارادیت کا احترام کرے۔
وزیراعظم نے دہشت گردی کو ایس سی او خطے کو درپیش سنگین ترین خطرات میں سے ایک قرار دیتے ہوئے کہا کہ پاکستان دہشت گردی سے سب سے زیادہ متاثرہ ملک ہے، ہم نے دہشت گردی کے خلاف جنگ میں 90 ہزار سے زائد جانوں کی قربانیاں دیں۔ وزیراعظم نے اپنے مدلل اور تفصیلی خطاب میں واضح کیا کہ تین ارب سے زائد آبادی والے ایس سی او خطے میں علاقائی رابطہ کاری اب انتخاب نہیں بلکہ تزویراتی ضرورت ہے۔ رکن ممالک کو روشن اور خوشحال مستقبل کے لیے مل کر آگے بڑھنا ہوگا۔
انہوں نے ایس سی او ترقیاتی حکمتِ عملی 2035 پر عملدرآمد ضروری قرار دیتے ہوئے ایس سی او ترقیاتی بینک کے قیام کی ضرورت پر زور دیا۔ وزیراعظم نے کہا کہ پاکستان غربت کے خاتمے اور سماجی تحفظ کے فروغ کے لیے کردار جاری رکھے گا۔ وزیراعظم نے اپنے خطاب میں ازبکستان اور کرغزستان کو ان کے یوم آزادی پر مبارکباد دیتے ہوئے دونوں ملکوں کی قیادت اور عوام کے لیے نیک تمناؤں کا اظہار کیا۔