خوشاب(راجہ نورالہی عاطف سے)
سابق سینیٹر ڈاکٹر غوث محمد خان نیازی نے میڈیا سے خصوصی گفتگو کرتے ہوئے کہا ہے کہ وزیراعظم پاکستان میاں محمد شہباز شریف اور وزیراعلیٰ پنجاب مریم نواز شریف کی عوام دوست پالیسیوں کے مثبت نتائج سامنے آ رہے ہیں۔ حکومت کی جانب سے عوام کو ریلیف کی فراہمی، ترقیاتی منصوبوں کے فروغ اور بنیادی سہولیات کی بہتری کے لیے عملی اقدامات قابلِ تحسین ہیں۔
موجودہ حکومت مشکل معاشی حالات کے باوجود عوام کو زیادہ سے زیادہ ریلیف دینے کے لیے کوشاں ہے۔ وزیراعظم شہباز شریف کی قیادت میں ملکی معیشت کو مستحکم کرنے، سرمایہ کاری کے فروغ اور عوامی مسائل کے حل کے لیے اقدامات کیے جا رہے ہیں۔
انہوں نے کہا کہ وزیراعلیٰ پنجاب مریم نواز شریف کی جانب سے صوبے کے عوام خصوصاً کم آمدنی والے طبقات، کسانوں، طلبہ، خواتین اور نوجوانوں کے لیے شروع کیے جانے والے فلاحی اور ترقیاتی اقدامات بھی قابلِ ستائش ہیں۔ عوام دوست منصوبوں کا بنیادی مقصد عام آدمی کی زندگی میں آسانیاں پیدا کرنا اور اسے بہتر سہولیات فراہم کرنا ہے۔
حکومت کی کامیابی کا اصل پیمانہ عوام کی خوشحالی اور ان کے مسائل کا حل ہے۔ اگر عوام کو روزگار، تعلیم، صحت، صاف پانی، بہتر سڑکیں اور دیگر بنیادی سہولیات میسر ہوں تو یہی حقیقی عوامی خدمت ہے۔
حکومت اور عوام کے درمیان مضبوط رابطہ وقت کی اہم ضرورت ہے۔ انہوں نے امید ظاہر کی کہ وزیراعظم شہباز شریف اور وزیراعلیٰ مریم نواز شریف کی قیادت میں عوامی فلاح و بہبود اور ترقی کا سفر مزید تیز ہوگا۔