کراچی :عالمی اور مقامی مارکیٹوں میں اتار چڑھاؤ کے بعد آج پاکستان میں سونے کی قیمت بغیر کسی ردوبدل کے مستحکم ہے جب کہ چاندی کی قیمتوں میں اضافے کا رحجان رہا۔
بین الاقوامی بلین مارکیٹ میں فی اونس سونے کی قیمت بغیر کسی تبدیلی کے 4 ہزار 605 ڈالر کی سطح پر مستحکم رہنے کے باعث مقامی صرافہ مارکیٹوں میں بھی جمعہ کو فی تولہ سونے کی قیمت بغیر کسی تبدیلی کے 4 لاکھ 83 ہزار 036 روپے کی سطح پر مستحکم رہی۔
اسی طرح فی 10 گرام سونے کی قیمت بھی بغیر کسی تبدیلی کے 4 لاکھ 14 ہزار 125 روپے کی سطح پر مستحکم رہی۔
اس کے برعکس فی اونس چاندی کی قیمت 1 ڈالر 80 سینٹس بڑھ کر 70 ڈالر 30 سینٹس کی سطح پر آنے سے مقامی صرافہ مارکیٹوں میں بھی فی تولہ چاندی کی قیمت 180 روپے کے اضافے سے 7 ہزار 509 روپے اور فی 10 گرام چاندی کی قیمت بھی 154 روپے کے اضافے سے 6 ہزار 437 روپے کی سطح پر آگئی۔
واضح رہے کہ گزشتہ روز سونے کی قیمت کم اور چاندی کی قیمت میں اضافہ ریکارڈ ہوا تھا، فی تولہ سونا 3 ہزار 500 روپے اور 10 گرام سونا 3 ہزار ایک روپے سستا ہوا تھا۔ اسی طرح فی تولہ چاندی 50 روپے مہنگی ہوکر 7 ہزار 329 روپے ہوگئی تھی جب کہ 10 گرام چاندی کی قیمت 43 روپے اضافے سے 6 ہزار 283 روپے پر پہنچ گئی تھی۔
