ایران پر امریکی پابندیوں کا متوقع اعلان :تیل کی عالمی قیمتوں میں کمی

نیویارک +لندن :عالمی منڈی میں تیل کی قیمتوں میں پیر کو ایک ڈالر فی بیرل سے زیادہ کمی ریکارڈ کی گئی، جس کی بنیادی وجہ سرمایہ کاروں کی جانب سے منافع کا حصول اور امریکا کی جانب سے ایران پر مزید پابندیوں کے متوقع اعلان سے قبل محتاط رویہ ہے۔ نئی پابندیوں سے مشرق وسطیٰ سے تیل کی سپلائی مزید متاثر ہونے کا خدشہ ظاہر کیا جا رہا ہے۔
پیر کو برینٹ کروڈ کے فیوچرز کی قیمت 1.22 ڈالر یا 1.29 فیصد کم ہوکر 93.17 ڈالر فی بیرل ہوگئی، جبکہ امریکی ویسٹ ٹیکساس انٹرمیڈیٹ (ڈبلیو ٹی آئی) خام تیل 1.20 ڈالر یا 1.38 فیصد کمی کے بعد 85.86 ڈالر فی بیرل پر آگیا۔
دونوں بینچ مارک گزشتہ ہفتے مسلسل دوسری ہفتہ وار تیزی کے ساتھ بند ہوئے تھے اور ان کی قیمتوں میں 5 فیصد سے زیادہ اضافہ ہوا تھا۔ امریکا اور ایران کے درمیان امن مذاکرات میں تعطل کے باعث آبنائے ہرمز سے تیل کی ترسیل متاثر ہوئی ہے، جہاں عالمی سطح پر استعمال ہونے والی تقریباً 20 فیصد حصے کی تیل سپلائی گزرتی ہے۔