دیر بالا(بیورو چیف ریاض ابوالخیل)
دیر بالا: ڈسٹرکٹ پولیس آفیسر دیر بالا اسلم نواز کی زیر صدارت جرگہ ہال واڑی میں پولیس دربار منعقد ہوا، جس میں ایس ڈی پی او واڑی فخر عالم خان، ایس ایچ اوز، ایلیٹ فورس، ایف آر پی، ٹریفک سٹاف اور پولیس افسران و جوانوں نے شرکت کی۔پولیس جوانوں نے ٹرانسفر پوسٹنگ، ترقیابی، ویلفیئر، میڈیکل بلز اور پروموشن کورسز سمیت مختلف مسائل پیش کیے، جن کے حل کے لیے ڈی پی او دیر بالا نے موقع پر ضروری ہدایات جاری کیں۔ڈی پی او دیر بالا اسلم نواز نے کہا کہ پولیس جوانوں اور شہدائے پولیس کے ورثاء کی فلاح و بہبود اولین ترجیح ہے۔ انہوں نے جوانوں کو موجودہ سیکیورٹی صورتحال میں مکمل چوکسی، نظم و ضبط اور پیشہ ورانہ رویہ اپنانے، جبکہ عوام کے ساتھ خوش اخلاقی اور سائلین کے مسائل کے فوری حل کی ہدایت کی۔ ٹریفک سٹاف کو ”پہلے سلام، پھر کلام“ کی پالیسی پر عملدرآمد کی بھی تاکید کی۔ دہشت گرد عناصر پولیس کے حوصلے پست نہیں کرسکتے، دیر بالا پولیس امن کے قیام کے لیے سیسہ پلائی دیوار کی طرح اپنے فرائض انجام دے رہی ہے۔ ڈی پی او دیر بالا نے امن کمیٹی اور دیر بالا کے غیور عوام کا پولیس کے ساتھ شانہ بشانہ کھڑے ہونے پر شکریہ ادا کرتے ہوئے انہیں خراج تحسین پیش کیا۔پولیس دربار کے اختتام پر ڈی پی او دیر بالا نے یادگار شہداء پر حاضری دی، پھول چڑھائے اور شہدائے پولیس کے بلند درجات، ملکی سلامتی اور امن کے لیے دعا کی۔ بعد ازاں پولیس جوانوں کے اعزاز میں کھانے کا اہتمام کیا گیا، جہاں ڈی پی او دیر بالا نے جوانوں کے ساتھ گھل مل کر ان کی حوصلہ افزائی کی۔
