لاہور: وزیراعلیٰ پنجاب مریم نواز شریف کی زیر صدارت صوبے بھر میں پینے کے صاف پانی کی فراہمی کے منصوبوں کا جائزہ لینے کے لیے مسلسل چھٹا اہم اجلاس منعقد ہوا۔ اجلاس میں مختلف اضلاع میں جاری واٹر فلٹریشن پلانٹس کے منصوبوں پر پیشرفت کا تفصیلی جائزہ لیا گیا اور پراجیکٹس کی بروقت تکمیل کے لیے سخت ہدایات جاری کی گئیں۔
اجلاس کے دوران بہاولنگر، بہاولپور، راجن پور، تلہ گنگ، اٹک، راولپنڈی، جہلم، رحیم یار خان اور چکوال کے اضلاع میں واٹر فلٹریشن پلانٹس کے پراجیکٹس پر تفصیلی بریفنگ دی گئی۔ مجموعی طور پر 9 اضلاع میں 2778 نئے واٹر فلٹریشن پلانٹس کے منصوبوں پر رپورٹس پیش کی گئیں۔
رحیم یار خان، بہاولپور، خوشاب اور ڈی جی خان میں واٹر بوٹلنگ پراجیکٹ پر مکمل اطمینان کا اظہار کیا گیا۔ بریفنگ میں بتایا گیا کہ ہر واٹر بوٹلنگ پوائنٹ پر روزانہ 2500 بوتل پانی عوام کو فراہم کیا جا رہا ہے، جبکہ یہ پلانٹس فی گھنٹہ 5 ہزار لیٹر صاف پانی مہیا کر رہے ہیں۔ اس کے علاوہ پوٹھوہار کے علاقوں میں چھوٹے ڈیموں (سمال ڈیمز) کے ذریعے بھی صاف پانی فراہم کیا جائے گا۔
مختلف کلسٹرز کے حوالے سے بریفنگ میں درج ذیل اعداد و شمار سامنے آئے:
کلسٹر ون (راجن پور اور رحیم یار خان): 702 مقامات میں سے 570 واٹر فلٹریشن پلانٹس مکمل ہو چکے ہیں جبکہ کھارے پانی والے علاقوں میں 95 آر او (RO) پلانٹس اور 52 یو ایف (UF) پلانٹس لگائے جائیں گے۔
کلسٹر فائیو (تلہ گنگ، جہلم، راولپنڈی، اٹک، مری اور چکوال): 1180 مقامات میں سے 902 واٹر فلٹریشن پلانٹس مکمل کر لیے گئے ہیں، جبکہ ان علاقوں کے کھارے پانی کے لیے 231 آر او پلانٹس بھی اس منصوبے کا حصہ ہیں۔
کلسٹر 14 (بہاولپور اور بہاولنگر): 892 سائٹس میں سے 749 مکمل ہو چکی ہیں۔ اس میں چشتیاں، منچن آباد، ہارون آباد اور فورٹ عباس کی 482 میں سے 368 سائٹس، اور بہاولپور، یزمان، احمد پور اور حاصل پور کی 410 میں سے 351 سائٹس شامل ہیں۔ ان علاقوں میں 130 آر او پلانٹس، 64 یو ایف پلانٹس اور ایم ایف پلانٹس بھی نصب کیے جائیں گے۔
وزیراعلیٰ مریم نواز شریف نے صوبے بھر میں موجود 736 غیر فعال واٹر فلٹریشن پلانٹس کو فوری طور پر بحال کرنے کے لیے ہنگامی اقدامات کا حکم دیا۔ انہوں نے واضح کیا کہ عوام کی سہولت کے پیش نظر واٹر فلٹریشن پلانٹس کے تمام پراجیکٹس کی بروقت تکمیل انتہائی ضروری ہے کیونکہ پینے کے صاف پانی کی دستیابی ہر شہری کا بنیادی حق ہے اور اس میں کسی قسم کی سستی برداشت نہیں کی جائے گی۔
وزیراعلیٰ مریم نواز شریف کی زیر صدارت چھٹا اعلیٰ سطح اجلاس، 736 غیر فعال پلانٹس کی فوری بحالی کا حکم
