چکوال مہتاب نصیر اعوان سے
ہر طرف پرچم کشائی کی تقاریب منعقد کی جا رہی ہیں ۔ اسی سلسلے میں عالمی روحانی جماعت کاروان ناجیہ کے زیرِ اہتمام جامع مسجد و مرکزی روحانی درسگاہ کاروان ناجیہ، جہلم روڈ چکوال میں پرچم کشائی کی پروقار تقریب منعقد ہوئی، جس میں ملک کے مختلف علاقوں سے کاروان ناجیہ کے ذمہ داران، کارکنان اور عقیدت مندوں نے بڑی تعداد میں شرکت کی۔تقریب کے موقع پر بانی و سرپرستِ اعلیٰ عالمی روحانی جماعت کاروان ناجیہ پیر معرفت حضرت محمد ظفر منصور مدظلہ العالی نے سبز ہلالی پرچم لہرایا۔ پرچم کشائی کے موقع پر شرکاء نے قومی پرچم ہاتھوں میں تھام رکھے تھے جبکہ فضا پاکستان زندہ باد اور جشنِ آزادی کے نعروں سے گونجتی رہی۔اسی سلسلے میں کاروان ناجیہ کے زیرِ اہتمام گاڑیوں پر مشتمل کانوائے بھی نکالا گیا، جس میں بڑی تعداد میں کارکنان اور ذمہ داران نے شرکت کی۔ کانوائے میں شریک گاڑیوں پر قومی پرچم لہراتے رہے جبکہ شرکاء نے پاکستان زندہ باد اور جشنِ آزادی کے نعروں کے ساتھ وطنِ عزیز سے اپنی محبت کا اظہار کیا۔تقریب میں شریک افراد نے وطنِ عزیز پاکستان سے اپنی محبت اور وابستگی کا اظہار کرتے ہوئے قومی پرچموں کے ساتھ جشنِ آزادی کی خوشیوں میں بھرپور شرکت کی۔ اس موقع پر پاکستان کی سلامتی، استحکام، ترقی، خوشحالی اور بقا کے لیے خصوصی دعائیں بھی کی گئیں۔