مسجد جانے والے نمازیوں سمیت شہریوں کو آمدورفت میں شدید دشواری کا سامنا
وزیرآباد (ڈسٹرکٹ رپورٹر)
نواحی علاقہ دھونکل کے محلہ موچی پورہ میں عرصہ دراز سے جمع پانی نے علاقہ مکینوں کے لیے مشکلات پیدا کر دی ہیں اور گلیاں تالاب کا منظر پیش کرنے لگی ہیں۔ مسجد جانے والے نمازیوں سمیت شہریوں کو آمدورفت میں شدید دشواری کا سامنا ہے۔ علاقہ مکینوں کی جانب سے ڈپٹی کمشنر سمیت متعلقہ اداروں کو متعدد بار شکایات اور صورتحال سے آگاہ کیے جانے کے باوجود مسئلہ تاحال حل نہ ہو سکا۔صورتحال کا جائزہ لینے کے لیے مقامی سیاسی رہنما چوہدری عنصر محمود سندھو نے چوہدری سلیمان جوندہ اور مہر غلام مصطفیٰ سرپرست اعلیٰ وزیرآباد پریس کلب کے ساتھ محلہ موچی پورہ کا دورہ کیا۔انہوں نے مقامی افراد کے ہمراہ مختلف گزرگاہوں اور متاثرہ مقامات کا معائنہ کیا اور شہریوں سے مسائل کی تفصیلات معلوم کیں۔ اس موقع پر انہوں نے صورتحال پر افسوس کا اظہار کرتے ہوئے ایم این اے بلال فاروق تارڑ سے بھی رابطہ کیا اور متاثرہ علاقے کی لوکیشن اور مسائل سے متعلق تفصیلات ارسال کیں۔چوہدری عنصر محمود سندھو کا کہنا تھا کہ محلہ موچی پورہ کے رہائشی طویل عرصے سے اس دیرینہ مسئلے کا سامنا کر رہے ہیں، جو انتہائی افسوسناک صورتحال ہے۔ انہوں نے یقین دلایا کہ علاقہ مکینوں کا یہ مسئلہ ان شاء اللہ جلد حل کروانے کے لیے مؤثر اقدامات کیے جائیں گے۔انہوں نے کہا کہ گزرگاہوں اور اردگرد کی زمینوں میں جمع پانی کو مناسب اور مؤثر متبادل جگہ پر منتقل کرنے کے لیے متعلقہ حکام سے رابطہ کیا جائے گا، تاکہ شہریوں کو آمدورفت میں درپیش مشکلات سے نجات مل سکے۔ ان کا کہنا تھا کہ عوامی مسائل کے حل کے لیے ہر ممکن کوشش جاری رکھی جائے گی اور محلہ موچی پورہ کے مکینوں کو مزید مشکلات میں نہیں چھوڑا جائے گا۔