” چرسی پائلٹ“ کے انکشاف کے بعد ایئر انڈیا کا تمام پائلٹس کے لیے ڈرگ ٹیسٹ لازمی قرار دینے کا فیصلہ

نئی دہلی: ایک حالیہ اور خطرناک فضائی حادثے کے بعد معروف ائیرلائن ’ایئر انڈیا‘ نے اپنے تمام پائلٹس کی جامع ڈرگ سکریننگ (منشیات کے ٹیسٹ) کو لازمی قرار دے دیا ہے۔ خبر رساں ادارے اے ایف پی کے مطابق یہ سخت فیصلہ ایک ایسے واقعے کے بعد کیا گیا ہے جس میں تھائی لینڈ سے دہلی آنے والی پرواز کے دوران طیارے کے کپتان کا چرس استعمال کرنے کا ٹیسٹ مثبت آیا تھا۔
یہ بھی پڑھیں:
ایئر انڈیا کے ”چرسی پائلٹ ”کا ہوش اڑا دینے والا کارنامہ: جہاز اچانک 300 فٹ نیچے آ گیا، ڈوپ ٹیسٹ میں نشے کی تصدیق!
موجودہ قوانین کے تحت ایئرلائنز کو سالانہ صرف 10 فیصد فضائی عملے کے اچانک ڈرگ ٹیسٹ کرنے کی اجازت ہے، لیکن اس لرزہ خیز واقعے کے بعد ایئر انڈیا نے اپنے تمام پائلٹس کا مکمل طبی معائنہ اور سکریننگ شروع کر دی ہے تاکہ کسی بھی غیر قانونی یا ممنوعہ مادے کے استعمال کا بروقت سدباب کیا جا سکے۔
واضح رہے کہ یہ واقعہ ایسے حساس وقت میں پیش آیا ہے جب ایئر انڈیا پہلے ہی جون 2025 کے تباہ کن احمد آباد-لندن حادثے (جس میں 260 سے زائد افراد جاں بحق ہوئے تھے) کے بعد اپنی ساکھ بحال کرنے کی کوششوں میں مصروف ہے۔ حال ہی میں ائیرلائن نے اپنے آپریشنز کو بہتر بنانے کے لیے ایتھوپین ایئرلائنز کے سابق سربراہ ٹیوولڈے گیبریاماریام کو نیا چیف ایگزیکٹو بھی مقرر کیا ہے۔