13 سے 15 اگست کے دوران ملک کے مختلف حصوں میں موسلادھار بارشوں اور اربن فلڈنگ کا الرٹ جاری

اسلام آباد: محکمہ موسمیات نے مون سون ہواؤں اور مغربی سلسلوں کے اثرات کے تحت ملک کے بالائی اور وسطی علاقوں میں 13 سے 15 اگست کے دوران گرج چمک کے ساتھ بارشوں کی پیشگوئی کی ہے، جبکہ بعض مقامات پر موسلادھار بارشوں سے اربن فلڈنگ اور لینڈ سلائیڈنگ کا خطرہ بھی ظاہر کیا گیا ہے۔
رپورٹ کے مطابق کشمیر کے بیشتر اضلاع (بشمول نیلم ویلی، مظفرآباد، راولاکوٹ اور میرپور) اور گلگت بلتستان کے مختلف علاقوں (جیسے دیامر، استور، اسکردو اور ہنزہ) میں 12 اگست کی رات سے 15 اگست تک وقفے وقفے سے بارش کا سلسلہ جاری رہے گا۔
اس کے علاوہ بالائی خیبرپختونخوا (دیر، چترال، سوات، کوہستان، پشاور، مردان اور ایبٹ آباد وغیرہ)، شمال مشرقی پنجاب (مری، لاہور، سیالکوٹ، گوجرانوالہ، گجرات)، جڑواں شہروں (اسلام آباد اور راولپنڈی) سمیت پوٹھوہار ریجن میں 13 اگست کی شام سے 15 اگست کے دوران گرج چمک اور کہیں کہیں موسلادھار بارش متوقع ہے۔ پنجاب کے جنوبی و وسطی اضلاع، بالائی سندھ کے کچھ حصوں (تھرپارکر، عمرکوٹ، سانگھڑ) اور بلوچستان کے اضلاع (ژوب، بارکھان، موسیٰ خیل) میں بھی اس دوران بارش کا امکان ہے۔
محکمہ موسمیات نے شدید بارشوں کے باعث اسلام آباد، راولپنڈی، لاہور، گوجرانوالہ، سیالکوٹ، گجرات، مردان اور صوابی کے نشیبی علاقوں میں اربن فلڈنگ (شہری سیلاب) کا خدشہ ظاہر کیا ہے۔ جبکہ بالائی خیبرپختونخوا، گلگت بلتستان، مری، گلیات اور کشمیر کے پہاڑی علاقوں میں لینڈ سلائیڈنگ کے پیش نظر مسافروں اور سیاحوں کو انتہائی احتیاط برتنے کی ہدایت کی گئی ہے۔ کسانوں اور متعلقہ اداروں کو بھی ناخوشگوار صورتحال سے بچنے کے لیے پیشگی حفاظتی اقدامات کرنے کا مشورہ دیا گیا ہے۔