چکوال مہتاب نصیر اعوان سے
تحصیل چوآسیدن شاہ میں ہونے والی موسلادھار بارش نے ایک غریب خاندان پر قیامت ڈھا دی۔ شدید بارش کے باعث ڈلوال روڈ پر واقع ایک کچے مکان کی چھت اچانک منہدم ہو گئی، جس کے نتیجے میں گھر میں موجود تین افراد ملبے تلے دب کر شدید زخمی ہو گئےواقعے کی اطلاع ملتے ہی ریسکیو 1122 کی ٹیم فوری طور پر جائے وقوعہ پر پہنچ گئی۔ ریسکیو اہلکاروں نے مقامی شہریوں کی مدد سے امدادی کارروائیاں شروع کیں اور ملبے تلے دبے تینوں زخمیوں کو بحفاظت نکال لیا۔ریسکیو 1122 کے عملے نے زخمیوں کو موقع پر ابتدائی طبی امداد فراہم کی، جس کے بعد انہیں مزید علاج کے لیے تحصیل ہیڈکوارٹر ہسپتال چوآسیدن شاہ منتقل کر دیا گیا، جہاں ڈاکٹرز کی نگرانی میں ان کا علاج جاری ہےمقامی شہریوں کے مطابق حالیہ شدید بارشوں کے باعث متعدد کچے اور بوسیدہ مکانات خطرناک صورتحال اختیار کر چکے ہیں۔ عوام نے ضلعی انتظامیہ سے مطالبہ کیا ہے کہ خستہ حال مکانات میں رہائش پذیر غریب خاندانوں کی فوری مدد کی جائے اور ممکنہ مزید حادثات سے بچاؤ کے لیے مؤثر اقدامات کیے جائیں۔