پاکستان میں مون سون سسٹم داخل، پنجاب سمیت ملک بھر میں بارشیں ، گرمی کا زور ٹوٹ گیا

ملک میں مون سون سسٹم داخل ہوچکا ہے جس کے زیرِ اثر پنجاب کے صوبائی دارالحکومت سمیت صوبے کے بیشتر اضلاع میں بارشوں کا سلسلہ شروع ہو گیا، بارش اور تیز ہواؤں کے باعث حبس اور گرمی کی شدت میں نمایاں کمی آئی ہے ۔
لاہور میں صبح سے ہی سورج اور بادلوں کے درمیان آنکھ مچولی کا سلسلہ جاری رہا، جس کے بعد ایبٹ روڈ، ماڈل روڈ اور اسلام پورہ سمیت مختلف علاقوں میں گہرے بادل چھانے اور تیز ہواؤں کے ساتھ ہلکی بارش اور بوندا باندی ہوئی۔
محکمہ موسمیات نے بتایا کہ شہر کا موجودہ درجہ حرارت 31 ڈگری سینٹی گریڈ ریکارڈ کیا گیا ہے، ہوا میں نمی کی وجہ سے کم سے کم درجہ حرارت 26 سے 29 ڈگری جبکہ زیادہ سے زیادہ درجہ حرارت 36 سے 38 ڈگری سینٹی گریڈ تک جانے کا امکان ہے۔ بتایا گیا ہے کہ گجرات اور جہلم سمیت پنجاب کے دیگر شہروں میں ہونے والی موسلادھار بارش کی وجہ سے نشیبی علاقے زیرِ آب آ گئے ہیں اور گلی محلوں نے تالاب کا منظر پیش کرنا شروع کر دیا ہے، شدید بارش کے باعث لیسکو اور دیگر کمپنیوں کے متعدد بجلی کے فیڈرز ٹرپ کر گئے، جس کی وجہ سے بیشتر علاقوں میں بجلی کی فراہمی معطل ہو گئی، محکمہ موسمیات نے لاہور کے علاوہ گجرانوالہ، گجرات، سیالکوٹ، نارووال، چکوال اور راولپنڈی سمیت دیگر اضلاع میں بھی مزید بارش کا امکان ظاہر کیا ہے۔
پنجاب کے ساتھ ساتھ خیبرپختونخوا کے بالائی علاقوں اپر دیر، سوات، کوہستان، وزیرستان اور بلوچستان کے اضلاع خضدار، کوہلو، بارکھان میں بھی بادل برسنے کی توقع ہے، مون سون کی ان پہلی بارشوں کے پیشِ نظر میونسپل کارپوریشن، واسا، ایل ڈبلیو ایم سی سمیت تمام متعلقہ محکموں کو الرٹ جاری کر دیا گیا ہے تاکہ نکاسیِ آب کا کام فوری کیا جا سکے۔