لاس اینجلس: فیفا ورلڈ کپ 2026 کے پانچویں دن نے فٹ بال کی تاریخ میں ایک منفرد اور نایاب ریکارڈ قائم کر دیا ہے۔ ٹورنامنٹ کے پانچویں روز کھیلے گئے چاروں میچ بغیر کسی نتیجے کے ختم ہوئے، جس سے یہ دن فٹ بال کی عالمی تاریخ کے صفحات میں ہمیشہ کے لیے محفوظ ہو گیا ہے۔
Matchday 5 ✔️#FIFAWorldCup
— FIFA World Cup (@FIFAWorldCup) June 16, 2026
لاس اینجلس اسٹیڈیم میں گروپ جی کے فائنل میچ میں ایران اور نیوزی لینڈ کی ٹیمیں مدمقابل تھیں۔ یہ مقابلہ انتہائی سنسنی خیز رہا اور مقررہ وقت تک دونوں ٹیموں نے 2-2 گول اسکور کیے، جس کے نتیجے میں میچ برابری پر ختم ہوا۔ اس ڈرا کے بعد دونوں ٹیموں کو ایک ایک پوائنٹ مل گیا۔
اس سے قبل ایک ہی دن میں چار میچز ڈرا ہونے کا واقعہ 15 جون 1958 کو سویڈن میں منعقدہ ورلڈ کپ کے دوران پیش آیا تھا، اور اب ٹھیک 68 سال بعد 15 جون 2026 کو وہی تاریخ دوبارہ دہرائی گئی ہے۔
پانچویں دن کے چاروں میچوں کے نتائج کچھ یوں رہے:
کیپ وردے بمقابلہ اسپین: 0-0
بیلجیئم بمقابلہ مصر: 1-1
سعودی عرب بمقابلہ یوراگوئے: 1-1
ایران بمقابلہ نیوزی لینڈ: 2-2
1958 کے ورلڈ کپ میں بھی 15 جون کو سویڈن بمقابلہ ویلز (0-0)، انگلینڈ بمقابلہ آسٹریلیا (2-2)، پیراگوئے بمقابلہ یوگوسلاویہ (3-3) اور مغربی جرمنی بمقابلہ شمالی آئرلینڈ (2-2) کے میچز ڈرا ہوئے تھے۔
فٹ بال کے مبصرین کا کہنا ہے کہ ورلڈ کپ جیسے بڑے ایونٹ میں ایک ہی دن میں چار میچز کا برابری پر ختم ہونا اس بات کی غمازی کرتا ہے کہ ٹورنامنٹ میں ٹیموں کے درمیان مقابلہ کتنا سخت اور کانٹے دار ہے