چنئی: تمل ناڈو کے دارالحکومت چنئی کی ایک ڈسٹرکٹ کنزیومر کورٹ نے حفظانِ صحت کے اصولوں کی سنگین خلاف ورزی پر ایک مشہور بریانی آؤٹ لیٹ کو متاثرہ صارف کو 1.05 لاکھ روپے ہرجانہ ادا کرنے کا حکم دیا ہے۔
احمد صدیقی نامی شہری نے اپنی شادی کی تقریبات کے دوران رشتہ داروں کے لیے پیرمبور کے ایک معروف ریسٹورنٹ سے 3,500 روپے میں مٹن بریانی کی بالٹی خریدی تھی۔ گھر والوں نے جب کھانا شروع کیا تو بریانی میں ایک مردہ سینٹی پیڈ (کنکھجورا) دیکھ کر سب کے ہوش اڑ گئے۔ ریسٹورنٹ انتظامیہ کی جانب سے شکایت پر کوئی تسلی بخش جواب نہ ملنے پر متاثرہ شخص نے عدالت کا دروازہ کھٹکھٹایا۔
چنئی نارتھ ڈسٹرکٹ کنزیومر ڈسپیوٹ ریڈریسل کمیشن نے معاملے کی سماعت کے بعد ریسٹورنٹ کو ’سروس میں کوتاہی‘ کا مرتکب قرار دیا۔ عدالت نے ریسٹورنٹ کو حکم دیا کہ وہ درخواست گزار کو ذہنی اذیت کے ازالے کے لیے 1 لاکھ روپے معاوضہ اور مقدمے کے اخراجات کی مد میں 5,000 روپے ادا کرے۔ عدالت کا کہنا تھا کہ کھانے پینے کی اشیاء میں ایسی غفلت کسی بھی صورت ناقابلِ قبول ہے۔
