ٹنڈوالہیار رپورٹ تیمور رضا قائم خانی
ٹنڈوالہیار میں ڈکیتیوں کی بڑھتی وارداتیں، شہری عدم تحفظ کا شکار ضلع ٹنڈوالہیار میں جرائم پیشہ عناصر کی سرگرمیوں میں اضافہ دیکھنے میں آرہا ہے، جس کے باعث شہری شدید خوف و ہراس میں مبتلا ہیں۔تفصیلات کے مطابق سول اسپتال ٹنڈوالہیار کے بالمقابل گاؤں لال فقیر بہرانی کے رہائشی کیلے کے تاجر غلام شبیر بہرانی سے موٹرسائیکل سوار مسلح افراد نے اسلحے کے زور پر مبینہ طور پر 6 لاکھ روپے نقدی چھین کر فرار ہوگئے۔مقامی ذرائع کے مطابق واردات اس وقت پیش آئی جب متاثرہ تاجر اپنی کاروباری سرگرمی کے سلسلے میں رقم لے کر جارہا تھا کہ راستے میں نامعلوم مسلح افراد نے اسے روک لیا اور اسلحہ کے زور پر رقم چھین کر موقع سے فرار ہوگئے علاقہ مکینوں کے مطابق یہ کوئی پہلا واقعہ نہیں ہے، اس سے قبل بھی دو روز قبل پٹھان کالونی مین حیدرآباد روڈ پر ایک اور ڈکیتی کی واردات میں تقریباً 4 لاکھ روپے نقدی لوٹ لی گئی تھی۔ اس طرح مختصر عرصے میں دو بڑی وارداتوں نے قانون نافذ کرنے والے اداروں کی کارکردگی پر سوالیہ نشان لگا دیا ہے ۔۔