نوابشاہ (رپورٹ: نفیس آرائیں)ڈپٹی مئیر نوابشاہ چوہدری محمد مبشر آرائیں کی جانب سے جمشید کالونی میں واقع ڈپٹی مئیر ہائوس میں تھیلیسیمیا میجر میں مبتلا بچوں کے لیے بلڈ ڈونیشن کیمپ کا انعقاد کیا گیا، جس میں شہریوں، سماجی شخصیات اور نوجوانوں نے بھرپور شرکت کرتے ہوئے خون عطیہ کیا۔ کیمپ کے انعقاد کا مقصد تھیلیسیمیا کے شکار معصوم بچوں کو بروقت خون کی فراہمی یقینی بنانا اور انسانیت کی خدمت کے جذبے کو فروغ دینا تھا۔اس موقع پر ڈپٹی مئیر نوابشاہ چوہدری محمد مبشر آرائیں، نوابشاہ سٹی کے نائب صدر سردار علی احمد جٹ سمیت دیگر دوستوں نے بھی خون عطیہ کیا اور دکھی انسانیت سے عملی یکجہتی کا مظاہرہ پیش کیا۔تقریب سے خطاب کرتے ہوئے مقررین کا کہنا تھا کہ تھیلیسیمیا میں مبتلا بچوں کو مسلسل خون کی ضرورت رہتی ہے، لہذا مخیر حضرات اور نوجوانوں کو چاہیے کہ وہ زیادہ سے زیادہ بلڈ ڈونیشن کیمپس میں حصہ لے کر قیمتی انسانی جانوں کو بچانے میں اپنا کردار ادا کریں۔خون عطیہ کرنے والوں نے اس عمل کو روحانی سکون اور انسانی ہمدردی کا بہترین ذریعہ قرار دیتے ہوئے کہا کہ کسی ضرورت مند بچے کی زندگی بچانے سے بڑھ کر کوئی خدمت نہیں۔ مقررین نے عوام سے اپیل کی کہ وہ آگے بڑھ کر تھیلیسیمیا کے بچوں کے چہروں پر خوشیاں بکھیرنے کے لیے باقاعدگی سے خون عطیہ کریں، کیونکہ خون کا ایک عطیہ کسی کی پوری زندگی بدل سکتا ہے۔
