فی الحال جنگ بندی برقرار،ایران سے دوبارہ لڑائی کا فیصلہ صدر ٹرمپ کے ہاتھ میں ہے، پیٹ ہیگزیتھ امریکی وزیر جنگ

    واشنگٹن ڈی سی :امریکی وزیر جنگ پیٹ ہیگزیتھ نے اس عزم کا اظہار کیا ہے کہ امریکا ایرانی جارحیت سے بحری جہاز رانی کے تحفظ کے لیے کوشاں ہے۔ انہوں نے مزید کہا کہ آبنائے ہرمز میں شروع کیا گیا آپریشن جس کا نام پروجیکٹ فریڈم رکھا گیا ہے، ایک عارضی اقدام ہے۔
    پیٹ ہیگزیتھ نے ایک پریس کانفرنس میں واضح کیا کہ امریکا آبنائے ہرمز میں کسی قسم کا ٹکراؤ نہیں چاہتا لیکن بحری ٹریفک کو نشانہ بنانے والے کسی بھی ایرانی حملے کا تباہ کن جواب دیا جائے گا۔


    پیٹ ہیگزیتھ نے نامہ نگاروں سے گفتگو کرتے ہوئے کہا کہ ہم محاذ آرائی کے خواہاں نہیں ہیں لیکن ایران کو اس بات کی اجازت ہرگز نہیں دی جا سکتی کہ وہ غیر متعلقہ ممالک اور ان کے سامانِ تجارت کو بین الاقوامی آبی گزرگاہ عبور کرنے سے روکے۔
    انہوں نے ایرانیوں کو مخاطب کرتے ہوئے متنبہ کیا کہ اگر آپ نے امریکی افواج یا سویلین تجارتی جہازوں پر حملہ کیا تو آپ کو امریکا کی انتہائی طاقتور اور تباہ کن فائر پاور کا سامنا کرنا پڑے گا۔


    انہوں نے اس جانب بھی اشارہ کیا کہ ایران کے ساتھ جنگ بندی ابھی ختم نہیں ہوئی ہے لیکن تہران کو اپنے اقدامات میں محتاط رہنے کی ضرورت ہے۔
    فوجی کارروائیوں کی بحالی کے حوالے سے پیٹ ہیگزیتھ کا کہنا تھا کہ ایران کے خلاف دوبارہ لڑائی شروع کرنے کا فیصلہ امریکی صدر ڈونلڈ ٹرمپ کے ہاتھ میں ہے۔
    دوسری جانب امریکی جوائنٹ چیفس آف اسٹاف کے چیئرمین جنرل ڈین کین نے کہا ہے کہ آبنائے ہرمز میں جہازوں پر اب تک ہونے والے ایرانی حملے اس سطح تک نہیں پہنچے کہ امریکا بڑے پیمانے پر جنگی کارروائیاں دوبارہ شروع کرے۔


    اس کے باوجود جنرل کین نے اس بات پر زور دیا کہ اگر احکامات ملے تو ان کی افواج ایران کے خلاف بڑے پیمانے پر جنگی آپریشن دوبارہ شروع کرنے کے لیے پوری طرح تیار ہیں۔
    جنرل ڈین کین نے مزید کہا کہ امریکی سینٹرل کمانڈ اور دیگر مشترکہ افواج ایران کے خلاف بڑی جنگی کارروائیاں شروع کرنے کے لیے ہائی الرٹ پر ہیں، انہوں نے خبردار کیا کہ کوئی بھی دشمن ہماری موجودہ تحمل مزاجی کو ہماری کمزوری نہ سمجھے۔

    Related Posts