کبیروالا سے ناصرعلی شادابی کی رپورٹ
مطابق یونین کونسل کے سیکرٹری کی مبینہ غفلت اور بدانتظامی نے ایک زندہ حقیقت کو کاغذوں میں مذاق بنا دیا۔ چالیس سالہ شہری کو سرکاری ریکارڈ میں نومولود ظاہر کر دیا گیا۔ سیکرٹری یونین کونسل چک نمبر 11 خانیوال محمد رمضان کی جانب سے جاری کردہ ڈیتھ سرٹیفکیٹ میں مرحوم بشیر احمد کی تاریخ پیدائش، وفات اور تدفین ایک ہی دن یعنی 20 مارچ 2026 درج کر دی گئی، جبکہ اندراج کی تاریخ 25 مارچ 2026 لکھی گئی ہے۔حالانکہ مرحوم بشیر احمد کی تاریخ پیدائش 29 نومبر 1986 ہے جس سے ان کی عمر تقریبا چالیس سال بنتی ہے۔ ان پڑھ ورثا جب یونین کونسل سے ڈیتھ سرٹیفکیٹ لے کر ضروری امور کے لیے متعلقہ اداروں میں پہنچے تو یہ سنگین غلطی سامنے آئی اور سب کچھ آشکار ہو گیا۔یہ معاملہ محض ایک غلطی نہیں بلکہ ایک سنگین لاپرواہی ہے، جس نے متاثرہ خاندان کو شدید پریشانی اور ممکنہ قانونی پیچیدگیوں میں مبتلا کر دیا ہے۔ شبہ ظاہر کیا جا رہا ہے کہ یہ غلطی دانستہ بھی ہو سکتی ہے تاکہ بعد میں درستگی کے نام پر مزید فیس وصول کی جا سکے۔ متعلقہ حکام فوری نوٹس لیں، شفاف انکوائری کر کے ذمہ داران کا تعین کریں اور متاثرہ خاندان کو فوری ریلیف فراہم کرتے ہوئے درست ڈیتھ سرٹیفکیٹ جاری کیا جائے، تاکہ آئندہ ایسے واقعات کی روک تھام ممکن بنائی جا سکے۔جب مئوقف جاننے کے لیے یونین کونسل کے سیکرٹری محمد رمضان سے رابطہ کیا گیا تو اسنے کہا کہ یہ کلریکل غلطی ہے مرحوم کے ورثا دوبارہ درست ڈیٹھ سرٹیفیکیٹ مجھ سے حاصل کر سکتے ہیں۔