متحدہ عرب امارات پر حملوں کی مذمت، جنگ بندی برقرار رکھی جائے، پاکستان

اسلام آباد :وزیراعظم شہباز شریف نے متحدہ عرب امارات میں شہری تنصیبات پر میزائل اور ڈرون حملوں کی شدید مذمت کرتے ہوئے جنگ بندی برقرار رکھنے کی ضرورت پر زور دیا ہے۔
سماجی رابطے کی ویب سائٹ ایکس پر اپنے بیان میں وزیراعظم نے کہا کہ وہ صدر شیخ محمد بن زاید آل نہیان کے ساتھ مکمل یکجہتی کا اظہار کرتے ہیں۔ انہوں نے واضح کیا کہ پاکستان اس مشکل گھڑی میں اپنے اماراتی بھائی بہنوں اور وہاں کی حکومت کے ساتھ مضبوطی سے کھڑا ہے۔
کسی بھی ملک کا نام لئے بغیروزیراعظم کا مزید کہنا تھا کہ خطے میں پائیدار امن و استحکام اور مذاکرات کے لیے سفارتی گنجائش پیدا کرنے کی خاطر یہ انتہائی ضروری ہے کہ جنگ بندی کا احترام کیا جائے اور اسے برقرار رکھا جائے۔
یادرہےامریکا اور ایران کے درمیان گذشتہ روز ایک بار پھر کشیدگی دکھائی دی جب آبنائے ہرمز میں ایک دوسرے پر حملوں کے دعوے کیے گئے جبکہ گذشتہ رات متحدہ عرب امارات میں بھی میزائلوں اور ڈرونز سے عوامی مقامات کو نشانہ بنایا گیا۔
فجیرہ میں حکام نے پیر کی شب بتایا کہ فجیرہ آئل انڈسٹریز زون میں ایک حملے میں تین انڈین شہری معمولی زخمی ہوئے۔اور انہیں علاج کے لیے ہسپتال منتقل کر دیا گیا ہے۔