گوادر پورٹ عالمی تجارت کا نیا ‘محفوظ قلعہ’ بن گیا؛ ایم وی ایچ ایم او لیڈر کی آمد سے نئے باب کا آغاز!”

اسلام آباد: گوادر پورٹ پر خصوصی جہاز ایم وی ایچ ایم او لیڈر کی کامیاب برتھنگ عمل میں آئی، جہاں 35 یونٹس ٹرانس شپمنٹ کارگو ہینڈل کیا گیا۔ وفاقی وزیر بحری امور محمد جنید انوار چوہدری نے اس پیش رفت کو گوادر کی بڑھتی ہوئی اہمیت کا مظہر قرار دیا ہے۔
وفاقی وزیر نے اپنے بیان میں کہا کہ گوادر بندرگاہ علاقائی کشیدگی کے دوران ایک محفوظ بحری مرکز کے طور پر ابھر رہی ہے، جس کے باعث عالمی شپنگ لائنز محفوظ متبادل کے طور پر گوادر کا رخ کر رہی ہیں۔ ان کا کہنا تھا کہ خطے میں کشیدگی کے باعث روایتی شپنگ روٹس متاثر ہوئے ہیں، جس سے گوادر کی اہمیت میں مزید اضافہ ہوا ہے۔
محمد جنید انوار چوہدری نے بتایا کہ ٹرانس شپمنٹ کارگو کے لیے گوادر میں مفت اسٹوریج سہولت دستیاب ہے، جس سے اس کی مسابقتی حیثیت بہتر ہو رہی ہے۔ انہوں نے مزید کہا کہ گوادر پورٹ اور فری زون میں 16 ہزار ٹی ای یوز کنٹینرز ہینڈل کرنے کی استعداد موجود ہے، جبکہ جنرل کارگو کے لیے 90 ہزار مربع میٹر سے زائد اسٹوریج کی گنجائش بھی دستیاب ہے۔
وفاقی وزیر کے مطابق گوادر پورٹ مستقبل میں بلیو اکانومی اور علاقائی تجارت کے فروغ میں کلیدی کردار ادا کرے گا۔