لاہور ڈاکو اور انسانیت آمنے سامنے،،تھانے کے سامنے ڈکیتی انسانیت نے جرم کو مات دیدی

لاہور:لاہور کے علاقے شاہدرہ میں ایک چونکا دینے والا واقعہ پیش آیا، جہاں جرم اور انسانیت ایک ہی منظر میں آمنے سامنے آ گئے۔ شاہدرہ پولیس اسٹیشن کے عین سامنے ہونے والی ڈکیتی نے شہریوں کو ہلا کر رکھ دیا، تاہم اس کا انجام ایسا نکلا کہ متاثرہ افراد بھی حیرت میں ڈوب گئے۔ اطلاعات کے مطابق مقامی رہائشی راشد افطاری کے تقریباً دو گھنٹے بعد اچانک طبیعت بگڑنے پر گھر سے نکلے۔ حالت تشویشناک ہونے کے باعث انہوں نے ان ڈرائیو کے ذریعے فوری طور پر ڈاکٹر کے پاس جانے کا فیصلہ کیا۔ جیسے ہی موٹرسائیکل فیروزنوالہ کچہری کے قریب پل پر پہنچی، دو موٹر سائیکلوں پر سوار مسلح افراد نے انہیں روک لیا۔۔عینی شاہدین کے مطابق ڈاکوؤں نے پستول کے زور پر ڈرائیور کو یرغمال بنا کر نقدی چھین لی، جس سے موقع پر خوف اور بے بسی کی فضا چھا گئی۔ اس دوران جب ڈاکوؤں نے مسافر راشد کی تلاشی لینا شروع کی تو اس نے کمزور آواز میں بتایا کہ وہ شدید بیمار ہے اور مدنی پولی کلینک میں ڈاکٹر رؤف کو دکھانے جا رہا ہے۔
یہ سن کر صورتحال نے اچانک غیر متوقع رخ اختیار کیا۔ ذرائع کے مطابق ڈاکو چند لمحوں کے لیے خاموش ہو گئے، جیسے کسی اندرونی کشمکش میں مبتلا ہوں۔ پھر اچانک انہوں نے نہ صرف اپنی کارروائی روک دی بلکہ ڈرائیور سے چھینی گئی رقم واپس کر دی، متاثرہ افراد سے معذرت کی اور فوری طور پر موقع سے فرار ہو گئے۔