بھکر: (رپورٹ ملک سمیع اللہ )
ڈسٹرکٹ پولیس آفیسر (ڈی پی او) بھکر شہزاد رفیق اعوان کے خصوصی احکامات پر ضلع بھر میں امن و امان کی صورتحال کو برقرار رکھنے اور جرائم پیشہ عناصر کی سرکوبی کے لیے بڑے پیمانے پر کریک ڈاؤن شروع کر دیا گیا ہے۔ انٹیلیجنس بیسڈ سرچ آپریشنز کے ذریعے ضلع کے تمام تھانہ جات کی حدود میں مشکوک اور حساس مقامات کی کڑی نگرانی کی جا رہی ہے۔
پولیس کی بھاری نفری نے ضلع کے داخلی و خارجی راستوں پر ناکہ بندی کرتے ہوئے سخت چیکنگ کا نظام نافذ کر دیا ہے۔
ناکوں اور سرچ آپریشنز کے دوران مشتبہ افراد کی موقع پر ہی بائیو میٹرک تصدیق کی جا رہی ہے۔کرایہ داروں، ہوٹلوں، سرائے اور گیسٹ ہاؤسز میں ٹھہرنے والے افراد کے ریکارڈ کی مکمل انسپکشن جاری ہے۔
سنگین جرائم میں ملوث اشتہاری اور عادی مجرمان کی گرفتاری کے لیے پولیس ٹیمیں چھاپے مار رہی ہیں۔جبکہ غیر قانونی اسلحہ رکھنے والوں اور اسلحہ کی نمائش کرنے والے عناصر کے خلاف بلا امتیاز کارروائیاں کی جا رہی ہیں۔
شہریوں کا تحفظ اولین ترجیح
ڈی پی او بھکر شہزاد رفیق اعوان نے واضح کیا ہے کہ ان آپریشنز کا واحد مقصد جرائم کی بیخ کنی اور شہریوں کے جان و مال کا تحفظ یقینی بنانا ہے۔ انہوں نے مزید کہا کہ حساس مقامات کی سیکیورٹی مزید سخت کر دی گئی ہے اور پولیس گشت میں غیر معمولی اضافہ کر دیا گیا ہے تاکہ شرپسند عناصر کو سر اٹھانے کا موقع نہ مل سکے۔
ضلعی پولیس سربراہ کا کہنا ہے کہ جرائم پیشہ افراد کے خلاف یہ بلا امتیاز کارروائیاں اس وقت تک جاری رہیں گی جب تک ضلع مکمل طور پر پرامن نہیں ہو جاتا۔