لاہور : وزیراعلیٰ پنجاب مریم نواز شریف سے عالمی بینک کے صدر اجے بنگا نے ایک اعلیٰ سطحی وفد کے ہمراہ ملاقات کی۔ ملاقات میں پنجاب میں جاری مختلف ترقیاتی منصوبوں، مستقبل کی سرمایہ کاری اور سماجی شعبوں میں تعاون کو مزید وسعت دینے پر تفصیلی تبادلہ خیال کیا گیا۔ وزیراعلیٰ مریم نواز نے عالمی بینک کے وفد کا پرجوش استقبال کیا اور صوبے کی تعمیر و ترقی میں ورلڈ بینک کے کردار کو سراہا۔
عالمی بینک کے صدر اجے بنگا نے وزیراعلیٰ مریم نواز شریف کی قیادت میں پنجاب میں جاری فلاحی پراجیکٹس، خاص طور پر تعلیم، صحت، ٹورازم اور سکل ڈویلپمنٹ (مہارت کی منتقلی) کے پروگراموں کو زبردست خراجِ تحسین پیش کیا۔ انہوں نے کہا کہ پنجاب حکومت کے عوامی فلاح کے اقدامات قابلِ تحسین ہیں اور عالمی بینک ان منصوبوں کی کامیابی میں اپنا تعاون جاری رکھے گا۔
ملاقات کے دوران موسمیاتی لچک (Climate Resilience)، ڈیجیٹل گورننس اور جامع ترقی کے لیے مستقبل میں سپورٹ اور سرمایہ کاری کی یقین دہانی کرائی گئی۔ وزیراعلیٰ نے بتایا کہ ورلڈ بینک کے اشتراک سے ”کنیکٹڈ پنجاب پروگرام” تیار کیا جا رہا ہے، جو نہ صرف آئی ٹی انفراسٹرکچر کو بہتر بنائے گا بلکہ اقتصادی ترقی کو بھی متحرک کرے گا۔ انہوں نے کنٹری پارٹنرشپ فریم ورک (CPF) کی اہمیت پر بھی زور دیا۔
مریم نواز شریف نے گفتگو کرتے ہوئے کہا کہ "صحت اور تعلیم ہماری اولین ترجیحات ہیں اور ان شعبوں میں خطیر سرمایہ کاری کی جا رہی ہے۔” انہوں نے ورلڈ بنک کے وفد کو بتایا کہ ”اپنی چھت اپنا گھر” پروگرام کے ذریعے بے گھر افراد کو سستی رہائش فراہم کی جا رہی ہے۔
مستحق افراد کے لیے ”نگہبان پیکج” اور ”ہمت کارڈ” جیسی سماجی بہبود کی اسکیمیں کامیابی سے چل رہی ہیں۔
نواز شریف آئی ٹی سٹی اور عالمی آئی ٹی سرٹیفیکیشنز کے ذریعے نوجوانوں کو بااختیار بنایا جا رہا ہے۔
وزیراعلیٰ نے واضح کیا کہ ڈیجیٹلائزیشن کا مقصد صوبے میں کارکردگی اور شفافیت کو فروغ دینا ہے۔ پنجاب حکومت نے ڈیجیٹل ادائیگیوں، ای-پروکیورمنٹ اور زراعت میں بہتری کے لیے انقلابی اقدامات متعارف کرائے ہیں۔ انہوں نے مزید بتایا کہ عالمی بینک کے تعاون سے آبپاشی کے نظام کو بھی جدید خطوط پر استوار کیا گیا ہے جس سے زرعی پیداوار میں بہتری آئے گی۔
عالمی بینک کے وفد نے پنجاب حکومت کے مالی استحکام اور قابلِ عمل کاروباری ماڈلز کی کوششوں کو سراہا اور مستقبل میں مزید مالی و تکنیکی تعاون کا عزم دہرایا۔