لاہور (رپورٹ ملک ظہیر)
لاہور پولیس نے ایک بار پھر ثابت کر دیا کہ اگر نیت مضبوط ہو تو ملزمان بھی کم ہو سکتے ہیں اور برآمد رقم بھی شرما کر سکڑ سکتی ہے۔ نواں کوٹ لاہور میں ایسا ہی ایک “جادوئی” کارنامہ سامنے آیا جہاں چند منٹوں میں نہ صرف ملزمان کی تعداد کم ہوئی بلکہ ہزاروں روپے لمحوں میں سینکڑوں میں بدل گئے۔ قصہ کچھ یوں ہے کہ 23 جولائی کو نواں کوٹ پولیس کے سب انسپکٹر انور شہزاد نے فرائیڈ چکس والی گلی میں واقع ایک سنوکر کلب پر جوا کھیلنے کی اطلاع پر چھاپہ مارا۔ ملزمان کے مطابق پولیس نے موقع سے 14 نوجوانوں کو حراست میں لے کر تھانے روانہ کیا گیا لیکن حیرت انگیز طور پر راستے میں ہی پولیس کی گاڑی کو شاید کوئی “عددی جھٹکا” لگا اور تھانے پہنچتے پہنچتے ملزمان کی تعداد 10 رہ گئی۔ کہانی یہیں ختم نہیں ہوئی۔ تھانے میں کمرے کے اندر نام پتے لکھے گئے، اور جب حوالات کا دروازہ بند ہوا تو ملزمان کی تعداد مزید کم ہو کر 7 رہ گئی۔ جبکہ ملزمان کے دوست ارباز ، شاہزیب وغیرہ 3 نوجوان غائب ہوگئے سوال یہ ہے کہ باقی نوجوان کہاں گئے؟ کیا وہ ضمانت پر نہیں بلکہ غیبی راستے سے روانہ ہوئے؟
اس کے بعد پولیس نے 24 جنوری کو مقدمہ درج کیا، جس میں دعویٰ کیا گیا کہ 16 ہزار روپے برآمد کیے گئے۔ مگر جب ایف آئی آر کا بغور مطالعہ کیا گیا تو نوٹوں کی تفصیل نے خود پولیس کے دعوے کو جھٹلا دیا، کیونکہ ایف آئی آر کے مطابق رقم صرف 3100 روپے بنتی تھی۔
یعنی رقم بھی شاید پولیس کے ہاتھ لگتے ہی رجسٹرڈ ڈائٹ پر چلی گئی۔
25 جنوری کو ملزمان کے ورثا کو عدالت میں پیشی کے لیے بلایا گیا۔ عدالت میں جب ملزمان کے وکیل نے تفتیشی افسر سے گفتگو کے بعد ایف آئی آر، رقم کی ریکوری اور نوٹوں کی تعداد کا موازنہ کیا تو عدالت بھی مسکرائے بغیر نہ رہ سکی۔ نتیجتاً، ریکارڈ کی انہی “خدمات” کے صلے میں تمام ملزمان کو ڈسچارج کر دیا گیا۔
یہ واقعہ نہ صرف لاہور پولیس کی تفتیشی مہارت پر سوالیہ نشان ہے بلکہ اس انصاف پر بھی جو راستے میں گم، تھانے میں کم اور ایف آئی آر میں شرمندہ ہو جائے۔
عوام یہ پوچھنے میں حق بجانب ہیں کہ اگر یہی معیار ہے تو پھر جوا کلب بند کرنے کی کیا ضرورت؟ ملزمان خود ہی کم ہو جاتے ہیں اور کیس خود ہی ختم ہو جاتا ہے۔
لاہور پولیس کا یہ “جادو” واقعی قابلِ داد ہے
بس فرق اتنا ہے کہ جادو سرکس میں ہوتا ہے، تھانوں میں نہیں۔