پاکستان کی حفاظت ،سلامتی کے لیے جو بھی بن پڑا وہ کریں گے، علامہ راجہ ناصر عباس سینٹ میں اپوزیشن لیڈر منتخب

اسلام آباد: علامہ راجہ ناصرعباس سینٹ میں اپوزیشن لیڈر منتخب۔۔اپوزیشن لیڈر سینیٹ علامہ راجہ ناصر عباس کا کہنا ہے کہ واضح کرنا چاہتا ہوں میں عمران خان کا باوفا ساتھی ہوں، مجھے سینیٹر بھی اُسی نے بنایا اپنے اصولوں سے پیچھے ہٹنے والا نہیں ہیں، اپنے حلف کی کبھی خلاف ورزی نہیں کروں گا، کبھی بھی اصولوں پر سمجھوتہ اور آئین کی خلاف ورزی نہیں کروں گا، پاکستان کی حفاظت اور اس کی سلامتی کے لیے جو بھی بن پڑا وہ کریں گے۔
سینیٹ میں قائد حزبِ اختلاف کا عہدہ سنبھالنے کے بعد اپنے پہلے خطاب میں انہوں نے کہا کہ پاکستان میں لاقانونیت ہے، حکمرانوں کی ذمہ داری ہے کہ عدل و انصاف قائم کریں کیوں کہ بغیر عدل کے معاشرہ نہیں چل سکتا، اللہ نے تمام پیغمبر عدل قائم کرنے کے لیے بھیجے، آج تینوں ریاستی اداروں کا استقلال ختم ہوچکا ہے، چند دہشت گردوں کی تلاش میں پورا علاقہ اٹھا لیا جاتا ہے، اگر یہی کام عوام کو سونپ دیا جائے تو وہ خود دہشت گرد ڈھونڈ نکالیں۔
اپوزیشن لیڈر سینیٹ کا کہنا ہے کہ ہم لاہور گئے تو ہماری گاڑیوں کے شیشے توڑے گئے، کیا ہم دہشت گرد تھے؟ کیا لوگوں کو ہراساں کرکے نظام چلایا جا سکتا ہے؟ لوگوں کو بولنے دیا جائے اس سے ملک مضبوط ہوتا ہے، عمران خان اور تمام سیاسی قیدیوں کو آزاد کیا جائے، اس وقت ملک کا مقبول سیاسی لیڈر عمران خان ہے، موجودہ سیاسی بحران کے خاتمے کا واحد حل عمران خان کی رہائی ہے، ملک میں عدل و انصاف قائم کیا جائے۔
علامہ راجہ ناصر عباس کہتے ہیں کہ ہم پنجاب گئے تو راستے میں ہماری گاڑیوں کو توڑا گیا، یہ کون سا قانون ہے؟ ہم تو پر امن تھے کیا کسی نے پوچھا کہ ایسا کیوں ہوا؟ کیا لوگوں کی آوازوں کو دبا کر سسٹم چلا لیں گے؟ لوگوں کا سسٹم سے اعتبار اٹھ چکا ہے، جب بھی کوئی سسٹم عوام کا اعتماد کھو دیتا ہے تو اس کی سافٹ اور نیشل پاور ختم ہو جاتی ہے، یہ طاقت گولیوں، ٹینکوں، جہازوں اور توپوں سے نہیں بنتی، اسٹبلشمنٹ والے کہتے ہیں ان کا سیاست سے کوئی تعلق نہیں، کیا آپ سر پر قرآن رکھ کر کہہ سکتے ہیں ان کا سیاست سے کوئی تعلق نہیں؟ آپ اپنی ڈومین میں جائیں ملک کا دفاع کریں ہم سیلوٹ کریں گے، آرمی چیف آج اپنی ڈومین میں چلے جائیں تو ان کے ہاتھ چوموں گا۔
قبل ازیںچیئرمین سینیٹ یوسف رضا گیلانی نے سینیٹ کے قائد حزبِ اختلاف کی تقرری کا اعلان کردیا۔سینیٹ سیکرٹریٹ نے سینیٹ میں اپوزیشن لیڈرکی تعیناتی کا نوٹیفکیشن جاری کردیا، نوٹیفکیشن قائم مقام سیکرٹری سینیٹ کے دستخط سے جاری کیا گیا۔
ذرائع کے مطابق سینیٹر علامہ راجہ ناصر عباس نے اپوزیشن لیڈر کی نشست سنبھال لی ہے۔