چترال/ شیخوپورہ:(رپورٹ اسامہ طفیل)
شیخوپورہ کے نواحی گاؤں چیچو کی ملیاں سے تعلق رکھنے والے مہم جو نوجوان ڈیوڈ سکندر حیات نے چترال کی خوبصورت وادی گولین میں دنیا کے نایاب جانور آئی بیکس (Ibex) کا کامیاب شکار کر کے ایک منفرد اعزاز اپنے نام کر لیا ہے۔
ڈیوڈ سکندر حیات نے اپنی غیر معمولی مہارت کا ثبوت دیتے ہوئے 320 میٹر کے طویل فاصلے سے آئی بیکس کو ٹھیک نشانے پر لیا۔ شکار کیے گئے اس نایاب جانور کے دلکش اور خوبصورت سینگوں کی لمبائی 43 انچ بتائی جا رہی ہے، جو اس کی نسل کے بہترین نمونوں میں سے ایک ہے۔
اس مہم جوئی کی خاص بات یہ ہے کہ ڈیوڈ سکندر حیات مسیحی برادری سے تعلق رکھنے والے پہلے شکاری بن گئے ہیں جنہوں نے تمام تر قانونی تقاضے پورے کیے۔ انہوں نے محکمہ وائلڈ لائف کو مقررہ فیس ادا کرنے کے بعد باقاعدہ اجازت نامہ حاصل کر کے یہ شکار سرانجام دیا۔
ڈیوڈ سکندر حیات کے مطابق، آئی بیکس اور مارخور جیسے جانوروں کے قانونی شکار سے حاصل ہونے والی رقم کا 80 فیصد حصہ مقامی آبادی کی فلاح و بہبود، ترقیاتی کاموں اور علاقے کی بہتری پر خرچ کیا جاتا ہے۔
انہوں نے واضح کیا کہ آئی بیکس کا شکار محض شوق نہیں بلکہ جنگلی حیات کے نظام میں توازن برقرار رکھنے کا ایک ذریعہ ہے۔
آئی بیکس اپنی مخصوص عمر مکمل کرنے کے بعد جب قدرتی موت کے قریب پہنچ جاتا ہے، تو محکمہ وائلڈ لائف اس کے شکار کی منظوری دیتا ہے۔
اس اقدام کا مقصد جنگلی حیات کے حیاتیاتی نظام کو درست سمت میں رکھنا ہے۔
یہ کامیاب مہم جہاں ڈیوڈ سکندر حیات کے لیے ایک یادگار لمحہ ہے، وہیں ان کے آبائی شہر شیخوپورہ کے لیے بھی باعثِ فخر ہے۔