راولپنڈی: ڈی جی آئی ایس پی آر نے کانونٹ جیسس اینڈ میری، بیکن ہاؤس اور روٹس سکول سسٹم کے طلباء و طالبات اور اساتذہ کے ساتھ ایک خصوصی نشست میں شرکت کی۔ اس موقع پر انہوں نے افواجِ پاکستان کے آپریشنل اُمور، داخلی صورتحال اور قومی سلامتی کے تقاضوں پر تفصیلی گفتگو کی۔
پرنسپل کانونٹ جیسس اینڈ میری سکول نے پاک فوج کی لازوال قربانیوں کو خراجِ تحسین پیش کیا اور کہا کہ قوم کو اپنی مسلح افواج پر فخر ہے جو ملکی دفاع کے لیے ہمہ وقت تیار ہیں۔
طلباء نے کہا کہ ہمارے لیے یہ ایک اعزاز ہے کہ ہمیں پاک فوج کے نمائندے سے براہِ راست بات چیت کا موقع ملا۔ انہوں نے کہا کہ ڈی جی آئی ایس پی آر نے ہمیں سوشل میڈیا پر پھیلائے جانے والے پروپیگنڈا اور گمراہ کن معلومات کے بارے میں آگاہ کیا اور حقیقت کو درست زاویے سے دیکھنے کی تلقین کی۔
اساتذہ نے اپنے پیغام میں کہا کہ آج ہم نے یہ سیکھا کہ ازلی دشمن کے تزویراتی تکبر کا مقابلہ کس طرح کیا جاتا ہے۔ انہوں نے پاک فوج کے پختہ عزم، پیشہ ورانہ صلاحیت اور بہادری کو خراجِ تحسین پیش کیا۔
طلباء نے اس عزم کا اظہار کیا کہ بطور ذمہ دار شہری وہ سوشل میڈیا پر پھیلنے والے جھوٹے بیانیوں سے خود کو محفوظ رکھیں گے۔ انہوں نے کہا کہ میڈیا پر آنے والی خبروں کی سچائی جاننے کے لیے تحقیق ضروری ہے۔
طلباء نے کہا کہ پاک فوج اور پاکستانی عوام نے مل کر بھارت کے خلاف ایک مضبوط اتحاد قائم کیا ہے اور ہم بخوبی سمجھ چکے ہیں کہ کس طرح ہماری مسلح افواج ملک کو دہشت گردی کے خطرات سے محفوظ رکھنے کے لیے کوشاں ہیں۔