راولپنڈی : دو ٹیسٹ میچز کی سیریز کے آخری میچ میں جنوبی افریقہ نے پاکستان کو آٹھ وکٹوں سے شکست دے دی ہے۔
راولپنڈی کرکٹ سٹیڈیم میں ہونے والے میچ میں پاکستان کی ٹیم دوسری اننگز میں 138 رنز پر ڈھیر ہو گئی تھی اور جنوبی افریقہ کو جیت کے لیے 68 رنز کا ہدف دیا تھا۔پاکستان کی جانب سے چوتھے روز کا آغاز مایوس کن رہا، دن کے آغاز میں پاکستان کے چار وکٹوں کے نقصان پر 94 رنز تھے، کریز پر بابر اعظم اور محمد رضوان موجود تھے۔
بابر اعظم نصف سنچری سکور کرتے ہی سائمن ہارمر کی گیند پر ایل بی ڈبلیو آؤٹ ہوئے جس کے بعد محمد رضوان بھی کریز پر زیادہ دیر قائم نہ رہ سکے اور پھر وکٹیں گرنے کا سلسلہ تھم نہ سکا۔
جنوبی افریقہ کی جانب سے سائمن ہارمر نے چھ وکٹیں حاصل کیں، کیشو مہاراج نے دو جبکہ کگیسو ربادا نے ایک کھلاڑی کو آؤٹ کیا۔
اس کے بعد ہدف کے تعاقب کے لیے جنوبی افریقہ کے ریان رکلٹن اور ایڈن مارکریم میدان میں اترے۔
پاکستان کو دو وکٹیں نعمان علی نے دلائیں جب انہوں نے ایڈین مارکریم اور ٹریسٹن سٹبز کو آؤٹ کیا۔
پاکستانی پلیئنگ الیون
پاکستان کی جانب سے میدان میں اترنے والی ٹیم میں شان مسعود (کپتان)، عبداللہ شفیق، امام الحق، بابر اعظم، سعود شکیل، محمد رضوان، سلمان علی آغا، نعمان علی، ساجد خان، آصف آفریدی اور شاہین شاہ آفریدی شامل ہیں۔
جنوبی افریقہ کی پلیئنگ الیون
مہمان ٹیم ایڈم مارکرم (کپتان)، ریان رکلٹن، ٹرسٹن سٹبس، ٹونی ڈی زورزی، ڈیوالڈ بریوس، کائل ویرینے، سینوران متھوسوامے، مارکو جینسن، سمن ہارمر، کیشو مہاراج اور کگیسو ربادا پر مشتمل ہے۔