لاہور: وزیر اطلاعات پنجاب عظمیٰ بخاری نے شرجیل میمن کے بیان پر ردعمل دتے ہوئے کہا ہے کہ مسلم لیگ (ن) تعصب او ر لسانیت کی سیاست پر یقین نہیں رکھتی۔ انہوں نے سوال کیا کہ بلاول بھٹو مریم نواز کی تعریف کررہے ہیں،آپ انکو نہیں مانتے؟
اپنے ا یک بیان میں وزیر اطلاعات پنجاب عظمیٰ بخاری کا کہنا تھاکہ کراچی اور سندھ کے لوگ مریم نواز کو مانگتے ہیں۔شرجیل میمن کو جتنی وفاق اور پنجاب کی فکر ہے کاش اتنی سندھ اور کراچی کی فکر ہوتی۔
انہوں نے کہا کہ سارے پاکستان کو سکھانے کا آپ نے ٹھیکہ لیا لیکن خود نہیں سیکھنا،ایک جماعت نے مسلسل حکومت کے بعد سندھ اور کراچی کو زمانہ قدیم کا علاقہ بنادیا ہے۔
انہوں نے واضح کیا کہ پنجاب میں گندم کی کوئی کمی نہیں،پنجاب میں گندم وافر مقدار میں موجود ہے۔ وزیراعلی پنجاب مریم نواز کی بروقت پلاننگ سے لاکھوں جانیں بچائی گئی ہیں جبکہ آپکی پارٹی کے لوگ کہتے رہے بارش بند ہوگی تو باہر نکلیں گے۔
انہوں نے مزید کہا کہ یہاں چیف منسٹر پنجاب اور انکی پوری کابینہ سیلاب متاثرین کے درمیان موجود ہے،ایسی مثال سندھ کے پاس ہے تو ضرور سامنے لائیں ۔